Dili ihatag

Deart Tita Salie,

Have a wonderful day. Nagpasalamat gyod ko nga dunay luna sa inyong pahayagan ang Banat News nga moabiabi sa mga problema nato nga lisod isulti ngadto sa laing tawo o bisan sa suod natong higala tungod kay maulaw man kita nga masayran nila. Ang maong column ninyo dako kaayong tabang kanamong dunay suliran nga personal ug confidential kaayo.

Just call me Mark Anthony, minyo ko, Tita, ug ang akong problema mahitungod kini sa among pamilya, sa akong mga anak ug ugangan.

Ang akong asawa milarga paingon sa Norway kay tua man didto ang iyang trabaho. Unya gusto pod ko nga manarbaho sa Cebu busa akong gibilin ang among mga anak didto sa akong ugangan.

Sa pagbilin nako sa among mga anak duna kami papel nga gipermahan. Nakasulat didto nga dili nako makuha ang akong mga anak kun dili pa mopauli ang akong asawa. Ug nga ang kwarta nga ipadala sa akong asawa ang akong ugangan ang modawat tungod kay tua man didto ang akong mga anak.

Apan karon nahuman na ang akong trabaho, gusto na nako makuha ang akong mga anak.  Apan duna man kami pinermahan. Puyde ba nakong makuha ang mga bata, Tita? Palihog pasabta ko. Thank you and God bless.

* * *

Hello Mark,

Kun hain ang ginikanan dapat gyod nga tua usab ang iyang mga anak. Kun buhi pa ang ginikanan siya gyud ang mas dunay katungod sa iyang mga anak. Busa, since anaa ka na man nga amahan sa mga bata puyde na nimong kuhaon ang imong mga anak. Wala kay kasong atubangon kun imo silang kuhaon tungod kay ikaw ang amahan.

Seguro dili ihatag sa imong ugangan ang mga bata tungod kay dili na man unya sila ang makadawat sa kwarta nga ipadala sa imong asawa. Of course, dakong kawalan sa imong ugangan ang kwarta apan dapat nilang masabtan ug dawaton ang maong sitwasyon tungod kay duna nay laing pamilya ang ilang anak.

Mas maayo seguro nga imong kuntakon ang imong asawa ug imong ingnon nga siya ang makig-estorya sa iyang papa ug mama aron ilang masabotan ang kausaban. Ayaw lamang pugngi ang imong asawa nga motabang o mohatag og kwarta sa iyang pamilya.

Ang inyo lamang buhaton nga inyong hangyoon ang imong ugangan ug estoryahan sa minaayong paagi aron malikayan ang away ug kagubot sa inyong banay.

-- Tita Salie