Tulo ka regalo sa Pasko

Nagkapuliki si Nang Eulalia nga nagtrabaho sa iyang mga dekorasyon sa Pasko. Ingon pananglit sa iyang pagpamitay sa  iyang napalit nga Star didto sa iyang pagpanabo didto sa merkado. Kay nangompra siya alang sa mga lutuonon nga pagkaon alang sa ilang mga pagkaon sa panihapon sa pasko. Apan sa wala pa siya magluto didto sa ilang kosina gidalikyatan una niya ang pagpamitay sa mga parol nga iyang napalit didto sa merkado.

Nagsayawsayaw ang mga gagmay’ng bituon nga huypon sa mabugnaw nga gikan didto sa kabaybayonan.

Diin aniay mga dasok usab nga kalubihan. Nga gitamnan usab sa mga kasagingan. Ug gipanag-iya usab ni Eulalia, nga maoy kabilin pa ni Roman nga iyang bana.

Bisan may duha lang ka ektarya kining kaugalingon nilang yuta nga ilang napalit ni Roman sa ilang panagtipon sa salag sa kaminyoon.

Kining mao nilang yuta may mga abot sa lubi nga ilang makupras. Hasta sa mga saging nga kardaba, bangan, tundan, nga maoy tinubdan sa ilang pagka sapian.

Nakapatungha usab sila sa tulo nila ka mga anak nga sila si Amelita, Servando, Analisa, sa kolehiyo dinhi sa Iligan City.

“Pagtinarong kamo sa inyong pagtungha Amelita, Servando, Analisa, aron gayud kamo makatapos sa inyong tagsatagsa ka mga kurso,” matud pa ni Roman sa tulo nila ka mga anak. Nga pulos gayud nagtungha sa ‘University of Cebu’ sa Cebu City.

“Oo, Pa, magtinarong kaming tulo sa pagtungha aron kami gayud makatapos sa tagsatagsa namo ka mga kurso,” maoy tubag ni Amelita kang Roman nga iyang papa.

“Ako pa, usa ka maestra. Samtang si Servando usa ka enhinyero. Ug si Analisa usa ka doktora..” ni Amelita pa, nga nagpahiyom ug nagkatawa nga diha sa taliwala nila ni Roman ug Eulalia.

Kini maoy nahinumdoman karon, ni Eulalia sa iyang mga paghandom. Apan tungod sa mga druga sa sige pagyupyop sa mga sigarilyo nga marijuana, nangapriso silang tulo ka magsuon. Sa diha nga nadakpan sila sa akto sa mga  polis nga nagpatrolya, didto sa balay nilang giabangan sa dakbayan.

Tungod sa hilom nga kaguol nga gibati ni Roman sa nahitabo sa tulo nila ka mga anak ni Eulalia, didto sa siyudad kalit siya natumba sa salog nilang kawayan ug namatay dayon.

Mao kadto nga nabiyuda si Eulalia ni Roman nga iyang bana.Tungod sa tulo nila ka mga anak, nga nahimong mga biktima sa druga.

Dugay na kadto. Gani may lima na ka mga Pasko ang nakalabay nga nag-inusara si Eulalia nga nagsaulog sa mga Pasko sa iyang kinabuhi. Apan ning paskoha, may saad ang tulo niya ka mga anak nga sila mamauli. Kay natapos na ang ilang sentinsiya, sa ilang mga kaso sa druga. Tungod sa usa ka abogado nga gipadala ni Eulalia sa Muntinlupa nga si Attorney Romulo Veloso.

“Gikan karon, kamong tulo ka magsuon pagbinuotan na gayud kamong tanan,” matud pa ni Attorney Veloso, nga maoy nag-asikaso sa ilang mga kaso.

“Oo, attorney, magbinuotan na kami,” matud ni Amelita sa ilang abogado nga nangluha ang mga mata, isaad namo kanimo nga kaming tulo na gayud sa among kinabuhi magbag-o.”

“Maoy tubag usab ni Servando nga nangluha usab sa mga pagbasol ang iyang mata, sama kanila ni Amelita ug Analisa.

Tuod man sa ilang paghiuli sa ilang balay sa Lanao del Norte nahingangha pag-ayo si Eulalia sa tulo ka baso sa ‘Blend 45’ nga gitunol kaniya, sa tagsatagsa niya ka mga anak. Pulos gayud usab   nanghilak nga migakos kaniya.

“Ma, ania dawata, ang tulo namo ka regalo kanimo, niining pasko,” matud pa nilang tulo nga mitunol sa baso nga gisudlan sa mga luha sa pagka bilanggo. (Kataposan)