Dear Tita Salie,
Have a wonderful day. Just call me Mitch, 16 years of age, from Liloan Cebu. My problem is about my lovelife.
Duna ko’y boyfriend, Tita, nga kaedad ra usab nako. We really love each other and we are very close to each other. Bisan pa man sa among kabatan-on ug ka linghod sa panghunahuna apan daghan na ang nahitabo sa among relasyon. Nahatag na usab nako kaniya ang akong pagkababaye, Tita.
Naguol lang ko, Tita, tungod kay usa ka adlaw gidala ko ni mama dinhi sa Cebu City ug dinhi na mi nipuyo ni mama kay nagtrabaho man siya. Before mi nilarga ni mama nananghid ko sa boyfriend ug mitugot ra usab siya.
Pag-abot namo diri sa Cebu City ug hangtud nanglabay ang pila ka adlaw magsige pa siya og text nako. Apan sa kadugayan panagsa na lang ko niya mahinumdoman. Nanawag kanako ang iyang amigo ug misulti nga nagbinuang kuno ang akong uyab.
Tungod sa akong kalagot ako siyang gibulagan bisan kun kini sakit kaayo alang kanako. Paglabay sa pila ka adlaw nanawag kanako ang magulang sa akong uyab ug miingon nga dili pabulagan ang iyang manghod kay wala kini magbinuang.
Naglibog ko, Tita, kun kinsay akong tuohan. Unsa may akong buhaton? Palihog pasabta ko. Thank you, Tita, and more power.
* * *
Dearest Mitch,
Lisod gyod kaayo ang long distance relationship. Daghan gyod kaayo ang mga trials nga atong masugatan. Kun dili gyod lig-on ang usa’g-usa delikado gyod nga grabe unya ang epekto ngadto sa ilang gugma.
Mao bitaw nga kun ingon niini ang sitwasyon dili gyod maayo nga motuo ta dayon sa atong nadunggan nga mga tabitabi o chika-chika kay kini wala gyu’y kamatuoran. Usa lamang kini sa mga pagsulay aron inyong masukod kun unsa gyod kalig-on ang inyong relasyon. Dinhi usab nimo masuta kun duna ka pay pagsalig kaniya ug misalig ba kamo sa usa’g-usa.
Pero tan-awa usab ang imong boyfriend kun unsay iyang gibuhat karon. Dapat unta kanunay siyang magparandam diha kanimo kun tinuod siya nga nahigugma kanimo. Dili na unta kinahanglan nga ang iyang igsoon pa ang motawag nimo. Dapat siya mismo ang makig-estorya aron iyang matubag ang imong mga pangutana ug aron usab mawagtang ang tanan nimong pagduda. Apan unsay iyang gihimo, gipasagdan ka lang niya.
Busa ayaw una seryosoha ang imong gugma sa pagkakaron. Maoy atimana ang imong kaugalingon. Atimana ang imong pag-eskuyla aron mulampos ka kay kun kamo gyud ang magkadayon mobalik ra unya ang inyong maayo nga relasyon. -- Tita Salie