Ang callboy

Gula 6

Samtang nakig-estorya ni Mariano ang hamtung-babaye nga nagmaneho sa kotse ug gustong motilaw sa iyang serbisyo, gipasiklapan sa Bol-anon ang una niya nga kustomer.

Bana-bana ni Mariano nga nagpangedaron na og kapin sa 50 ang maong babaye apan seksi pa gihapon. Taud-taud, didto sila mosangko sa Happy Valley sa V. Rama Avenue. Misulod sila sa daw compound nga daghan og kwarto.

Tinted kaayo ang bildo sa kotse sa babaye ug mao nga dili makita nga babaye ang nagmaneho niini. Migawas ang babaye sa kotse human nga gisirad-an na ang garahe. Migawas ‘sab si Mariano.

Nasiguro si Mariano nga ang ilang gisudlan mao na ang giingon sa amigo niya nga si Elmer nga usa ka motel. Natiman-an ni Mariano ang gisuti ni Elmer kaniya nga inigsulod pa lang sa motel, pakitaan na nila nga mahal nila ang matrona.

Tuod, giagbayan dayon ni Mariano ang babaye samtang paingon sila nga mosulod sa kwarto. Si Mariano maoy mibukas sa pultahan kay mao kini ang gisulti kaniya ni Elmer.

Wala na mangutana pa si Mariano sa ngalan sa babaye kay giingnan na siya’ng daan ni Elmer nga dili kini himoon kay dunay ubang kustomer nga masuko kay wala kini labot sa ilang serbisyo.Misugod dayon si Mariano sa iyang gimbuhaton. Misantup pagbalik sa iyang kaisipan kadtong nakita niya sa sex video kun unsay gihimo sa lalaki ngadto sa babaye pagdayon pa lang og sulod nila sa kwarto.

Giparaygan pag-ayo ni Mariano ang babaye. Gipagilokan niya pinaagi sa paghawok sa iyang liog. Sanglit may gamay’ng bungot ang simod ni Mariano milampos siya pagpabatyag og kagilok sa babaye.

Miagulo ang babaye sa kagilok. Nahinangop si Mariano sa hilom ug gipadayon niya ang iyang gihimo subay sa iyang nakat-onan sa gitan-aw niya nga sex video.

Milampos si Mariano sa pagpabatyag og grabeng kahinam sa matrona tungod kay daw wala na kini mahimutang sa kaugalingon samtang walay hunong niya kini nga giromansa.

“Mar diay ang akong ngalan Ma’am,” hagawhaw ni Mariano dihang milunga siya kadiyot paghawok sa liog sa babaye. “Tawga ‘sab ko og Marie Fe,” matud sa babaye.

Bisan og may pagka hamtung na ang babaye apan nangalimyon kini sa kahumot. Nakapasamot kini sa kaagresibo ni Mariano nga miparayeg kaniya. Bisan og dili bansay si Mariano nga moparayeg og babaye, apan gihimo niya ang bisan unsa na lang.

Ang babaye na ang mihukas sa mga salimbong sa iyang lawas. Gisundog usab kini dayon ni Mariano. Padayon ang ilang pagparayganay. - Sumpayan