Gugmang tiunay

Gula 5

Daw midat-og ang kalibutan ngadto ni Miguel dihang iyang nadungog ang gisulti sa midwife nga namatay ang iyang asawa nga si Luz tungod sa pagpanganak.

“Inaya-naya na lang ang imong kaugalingon sir. Kun nadali pa unta pagdala sa ospital ang imong asawa, tingali maluwas pa ang imong asawa,” giingnan si Miguel sa midwife.

Taud-taud, nakita ni Miguel nga miabli ang pultahan sa delivery room ug adunay gipagawas nga giputos og panapton nga puti. Klaro kaayo nga usa ka patay ug nakasabot na si Miguel nga mao na kini ang iyang asawa nga si Luz.

Gisugat dayon kini ni Miguel. Halos dili niya makita ang iyang gilaktan samtang nag-ubay siya paglakaw sa katre nga adunay ligid ug gitulod sa usa ka kawani sa ospital. Pag-abut nila sa morgue, gitunol sa kawani sa ospital ang papel ngadto sa nagbantay sa morgue.

Wala gayud masayop si Miguel, ang asawa niya nga si Luz maoy gihatud sa morgue. Gibuksan niya ang gitabon sa nawong ni Luz ug sa laing higayon nakahilak na usab siya.

Wala’y laing nahimo si Miguel gawas sa pagpauli. Gipahibalo niya ang iyang inahan sa nahitabo sa iyang asawa.

“Sus, Maria y Josep. Mora man og nagmerida na g’yud tingali si Luz nga mamatay siya kay may gibilin siya nga suwat para kanimo sa wala pa kamo magagikan ganina,” matud sa inahan ni Miguel.

Nakalitan si Miguel pagkasayud nga may giandam nga suwat ang iyang asawa nga ipahatag kaniya. “Ang tugon ni Luz kanako nga ihatag kini kanimo kun dili na siya makabalik pa,” dugang sa inahan ni Miguel.

Gibuksan dayon ni Miguel ang suwat nga giandam ni Luz sa wala pa sila moadto sa ospital. Nagbutyag kini sa daku niini nga gugma ngadto kang Miguel. May address usab nga gibutang sa suwat ug ang ngalan sa iyang mga ginikanan nga pahibaw-on kun may mahitabo kaniya.

Basi sa address, nasabtan ni Miguel nga nahimutang sa bukid nga bahin sa Mindanao ang pinuy-anan sa iyang mga ginikanan. Wala gani contact numbers nga gibutang. Nakahuna-huna si Miguel nga suwatan ug pahibaw-on ang mga ginikanan ni Luz sa nahitabo sa ilang anak.

Nagsuwat si Miguel ug gipadala pinaagi sa special delivery mail. Apan miabot na lang ang usa ka semana, wala’y mga ginikanan ni Luz nga miabot. Napugos na lang si Miguel paglubong sa patay’ng lawas ni Luz. Mitambong usab ang pipila niini ka kauban sa trabaho.

Human malubong si Luz, haw-ang kaayo ang kinabuhi ni Miguel. Daghang mga gabii nga maghilak si Miguel nga maghigda sa iyang katre samtang maghandom sa iyang asawa. - SUmpayan