Namatay si Helen ning sayong kahaponon. Gidala na sa morgue sa Green Meadow Medical Center. Wa na kaagwanta sa iyang lawas sa cancer nga nikuyanap gikan sa iyang totoy hangtud ngadto sa iyang mga baga ug mga kidney. Nagpundok iyang tulo ka mga anak sa chapel sa ospital.
Giampo nila nga dawaton ang kalag sa ilang inahan sa gingharian sa Diyos. Naglaray og pangluhod ang mga tin-edyer nga sila si Iris, 17 anyos, Joy, 15 anyos ug Kevin, 13 anyos. Nanghubag ilang mga mata sa paghinilak.
Si Lino nga bana ni Helen, kasamtangang naghikay sa mga papeles aron madala sa punerarya ang lawas sa iyang asawa.
Dangtag usa ka oras, gipatawag ang mga tin-edyer sa morgue. Ug ila dayong giteksan ilang papa nga paadtoon sab sa morgue. Didto ilang nakita nga gibira ang dakong hunos nga gisudlan sa lawas sa ilang mama. Gibalhin ilang mama sa estretser. Ug dakong milagro. Dakong kahibulongan. Nagmata ilang mama. Maong gipatawag sila sa doktor nga in-charge sa morgue.
“Maaa! Buhi kaaa! Salamat sa Diyos!!! naglumba ang tulo og duol sa estretser. Nagpulipulig gakos sa ilang mama.
“O mga anak. Salamat sa Diyos,†ni Helen nga luspad pa nga nagpahiyom ug luyahon. Ug laghaw ang tingog.
“Nakahinabi nako ang Diyos amahan, Santo Niño ug Birhen Maria. Daw nagdamgo lang ko. Apan tinuod tingali. Kay nakamata man ko’g balik,†sumpay niya sa laghaw nga tingog. Naghigda gihapon sa estretser. Apan gibangilan og unlan iyang tangkogo ug abaga. Nahinuklog ang doctor nga nagsud-ong sa inahan ug mga anak.
“Unsa may pulong nila, Ma?†ni Iris.
“Giingnan ko nila nga pabalikon ko. Kay di pa nako panahon. Unya gihatod ko nila sa ato. Gikuyogan ko nila sa atong balay,†ni Helen.
“Malipay gyud ini si Papa,†ni Joy.
“Padalia inyong papa. Aron mamauli dayon ta,†ni Helen.
Gigakos nila’g usab ilang mama. Ug sukad adto, wa na sila’y kahadlok sa dangatan sa ilang inahan. Nasayod sila nga giandaman na ilang mama og luna sa langit. (Kataposan)