The world is round

Samtang nagtutok si Bitin sa regla sa dulang Baccarat, kalit lang may nanguhit sa iyang likod dungan ang pag-awhag: “Pustahi ang Draw, Tin!”

Napalingi ang ulitawo sa likod ug nakurat sa iyang nakita -- si Mrs. Pina A. Licoy, ang kanhi bigtayim sa kasino. Wala tuyoa, nanumbalay sa kaisipan ni Bitin kadtong una niyang pagkahimamat niini didto sa Manila Bay Casino, 25 ka tuig na ang nakalabay. Gitapuk-an sa mga tawo ang big table niadtong higayona, diin may matahom babaye nga mobundak og minilyon ka pesos sa lamesa kada taya.

Grabe kasaba ang mga amoyong (runner) nga miabiba. Samot na dihang midaog og ‘Draw’ ang maong super  VIP nga kustomer. Tanang palad nag-iyahay pagpamukhad nga mikumkom sa balato nga gihatag sa adunahang milyonariya. Lakip si Bitin, kinsa bag-o pa adtong dapita, napiksan sab og P500.

Sukad niadto, nahimo nang usa sa mga runner ni Mrs. Licoy si Bitin. Makakuwarta na siya pirme ug makakaon nag lamiang potahe kay isip bigtayim, igo ra mang pirmahan ni Mrs. Licoy ang bisa’ng unsang klase sa pagkaon ang ilang orderon. Ang VIP room, bisan wala pa sa oras nga ablihan, mahimong pabuksan ni Mrs. Licoy sa usa ka litik lamang sa  iyang pagmandar. Ingon niini siya kagamhanan sa management.

Apan mausabon ang panahon. Dili tanang adlaw puno sa tubig ang dam. May higayon nga mahubsan sab kini. Sama sa nahitabo ni Mrs. Licoy. Tungod sa sugal, nahurot ang tanan niyang salapi ug bahandi. Ug nabalitaan na lang nilang Bitin nga nanarbaho na lang kini sa Tsina. Mao nga dugay nang wala nila makit-i si Mrs. Licoy.

Napahit ni Bitin ang iyang ngabil. Wa siya magtuo nga maingon niini kalaksot ang dangatan sa hitsura ni Mrs. Licoy ning ilang panagkita karon. Sa pamarog, maila nga baratohon ang biste nga gisul-ob niini.

“Uy, Ma’am, ikaw diay na?” Daklit nga timbaya ni Bitin. “Sige, Ma’am, motaya ko sa Draw.” Ug gipatad sa ulitawo ang tibuok usa ka libong chip gikan sa iyang bolsa.

Pastilan, modaog bitaw na ang Draw, haskang siyagita sa nakapusta. Lakip na si Mrs. Licoy, kinsa nagpabiling nagbarog diha sa likod ni Bitin kuyog sa nagpunsisok nga amoyong, nagpunay lang gihapo’g abiba bisan dili na unta angay. Hisabtan sa ulitawo ang ipasabot sa gipakitang lihok ni Mrs. Licoy.

Dihang gibayran na sa bangkero si Bitin, iyang gitunol ang usa ka libong chips ngadto ni Mrs. Licoy agi’g balato. Gidawat kini sa babaye apan nahulog gikan sa bukogon nang kamot kay natandogan sa nagdinuotay nga mga amoyong. Ug didto motugpa ang chip sa atubangan ni Bitin nga misaliring sa ibabaw sa lamesa.

Sa hinurot nga kusog, midayeb si Mrs. Licoy sa talad-sugalan aron gukdon ang nagdagang chip nga paingon nang matagak sa ubos. Sa panagway niini, nakita ni Bitin ang kahadlok nga basi’g ilogon pa ang chip sa lain. Busa, wala na gani manumbaling si Mrs. Licoy nga masagbay ang mga luyat na niyang dughan sa abaga sa ulitawo. Gipaningkamotan gyod pag-ayo niini nga madakpan ang chip nga nagpadayon sa pagligid.

Naluoy si Bitin sa iyang nasaksihan. Tiaw bay, ang kanhi milyonarya, kinsa mora lang naglabay sa iyang minilyon ka pesos sa sugalan kaniadto, karon migukod sa usa lang ka libo nga chip? Wala kalikayi ang pagpanglugmaw sa mga mata ni Bitin samtang nagsud-ong ni Mrs. Licoy nga nakiglumba sa dagan sa chip. Igo na lang siyang nakapanglingolingo ug nanghupaw: “Hahayyy, the world is round gayod! (Kataposan)