Gugma’ng Tiunay

Luhaan ang mga mata ni Miguel samtang walay pupamilok nga gitutokan niya ang nitso sa lubong sa iyang asawa.

Samtang nagtutok si Miguel sa gilubngan sa iyang asawa, paspas usab kaayo nga nanumbalik sa iyang handurawan ang ilang matam-is nga kaagi. Sa sam-ang usab sa Caretta sila nagkaila kaniadto si Luz.

Tupad sa nitso ni Luz, anaa usab ang lubong sa Mama ni Miguel. Usa ka tuig pa nga namatay kaniadto ang Mama ni Miguel ug atul sa iyang pagbisita sa iyang lubong niini kaniadtong Nobyembre 1, 2010 iyang gikaila si Luz.

Samtang militok siya’g mga pulong sa pag-ampo alang sa mitaliwan niyang inahan, miabot ang duha ka babaye nga naghangad-hangad ug klaro kaayo nga may gipangita.

Didto mahimutang sa kinaibabwan han-ay ang lubong nga gibisitahan sa duha ka babaye. Dili sila makaabot sa pagbutang og kandela sa atubangan sa lubong.

“Ako na la’y butang sa kandela didto sa ibabaw miss,” matud ni Miguel nga mibulontaryo pagkatkat. Mao kadto ang sinugdanan sa ilang panagsuod ni Luz. Inahan diay ni Luz ang iyang gibisitahan.

Nakahukom si Luz nga paupson usa niya ang gidagkotan niya nga kandela mao nga miuna na lang sa pagpauli ang iyang kauban. “Mouna na lang ko day ha kay duna ka na bitaw kauban dinhi,” matud sa amiga ni Luz.

“Pareho diay ta Miguel nga nailo na sa inahan,” matud ni Luz nga mitutok kang Miguel. Pagkaupos na sa kandela nga gidagkot ni Luz, nananghid na kini nga mopauli.

“Sigi kay mopauli na ‘sab ko Luz, ihatud na lang tika kay duna man ko’y motorsiklo,” nahinangop kaayo si Luz nga dili na siya mahago pag-atang og kasakyan.

Kadto maoy sinugdanan sa ilang panagsuod ni Miguel ug Luz. Dunay mga higayon nga magkaabot sila si Luz ug Miguel nga moduaw sa lubong sa ilang mga inahan.

“Maayo tingali nga kanunayon na lang g’yud nato nga mobisita kita sa lubong sa atong mga inahan kada unang Lunes sa buwan Luz,” giingnan ni Miguel ang dalaga.

Sa tanto nila nga panagkuyog, inanay’ng migitib sa kasing-kasing ni Miguel ang kaibog ngadto ni Luz. “I love you Luz,” wala magpanuko si Miguel pagtug-an sa iyang gugma usa ka higayon nga sila nagkuyog na ‘sab.

Tam-is kaayo ang pahiyom ni Luz ngadto kang Miguel human niya madungog ang pulong I love you gikan sa ulitawo. Bisan og wala dayon dawata ni Luz ang gihalad nga gugma ni Miguel apan masabot kaayo nga may gusto siya sa ulitawo. - Sumpayan