Talagsaong budyong
Sa pagbidlisiw sa adlaw sa sayong kabuntagon sila si Romy ug Demet nanagat padulong sa isla sa Gilutungan. Nag-iniyahay sila sa pagpanagat. Si Romy nanawom og kinhason sa unahan kay namasin og hikaplagan niya ang mga mahalon nga kinhason.
Samtang si Demet namasol duol sa kabonbonan kay iya kining tiniman-an nga dasok sa mga isda. Ug pulos kini mga ulitawo maayo ang mga kinaiya ug kugihan usab kaayo. Apan ang problema lang gayud ni Romy apeki lang intawon ang hitsura ug ilabi na gayod sa iyang pagkabuktot kay dala man kini sa iyang pagkabata. Naproblema intawon siya kay tamayon lang siya sa mga dalaga kong mo diskarte na.
“Bay Demet, naa kahay mosugot nako nga apeki man akong hitsura ug buktot pa gayod,†matud ni Romy.
“Bay Romy, ayaw kabalaka kay ang Ginoo sa kanunay nagtan-aw sa mga nanginahanglan kaniya,†tubag ni Demet nga naluoy sa iyang higala.
Sa diha na si Romy sa dagat nangandoy siya nga makakuha og daghang kinhason aron makatigom og daghang kuwarta. Apan wala damha may nakita siya sa unahan nga adunay nagsidlak sidlak daw bulawan ang iyang nakita nga usa man diay ka talagsaong budyong kinhason.
Sukad masukad sa kadugay’ng panagat karon pa siya makakuha niini labi na sa gidak-on.
Nakahunahuna si Romy nga dili lang usa ibaligya ang talagsaong budyong kay mamasin kini nga nay matabang kaniya. Pagka-gabii namisita siya ni Lily ug nangindahay nga dawaton ang gugma.
“Lily, nia ako sa imong atubangan bisan ako bati’g hitsura ug buktot, panggaon ko ikaw hangtod sa akong kamatayon,†saysay ni Romy sagol hangyo nga sugton sa dalaga.
“Romy, dili ko mosugot nimo kay bati ka’g hitsura ug buktot pa gyud,†tubag ni Lily nga sagol pagbiaybiay sa ulitawo.
“Sige lang Lily kung unsa katam-is ang imong pag-ayad nimo nako dawaton ko,†ni Romy nga nihilak sa atubangan sa dalaga.
Sa pipila lang ka mga adlaw nibalik si Romy sa talagsaong budyong. Ug lagi kay way laing lingaw gisuwayan niya og huyop ang liki sa talagsaong budyong.
“Hala!, unsa ni akong nakita. Akong kuhaon ang samin aron maklaro. Ug, niguwapo man ko ug nawala ang akong pagkabuktot. Akong balikan si Lily pagpangulitawo,†ni Romy pa nga malipayon kaayo.
Sa dihang nibalik si Romy ni Lily kusog pa sa kilat ang pagsugot niini kay guwapo naman kaayo si Romy ug dili na buktot. Apan wala mabantayi sa duha nga sa pagtikyop sa kagabhion nahibalik na usab ang pagkabati sa hitsura ug pagkabuktot ni Romy kay ang talagsaong budyong nahupas ang gahom niini.
“Romy unsa pa man ang akong mahimo nga gikatugyan ko na ang akong lawas ug kalag tungod lang nianang imong talagsaong budyong,†matud ni Lily. (Kataposan)
- Latest
