Daghan ang nag-ingon nga sa matag piniliay nga pagahimoon sa nasyonal ug lokal maoy sagad nga motumaw ang mga pasangil sa nagkaatbang nga mga kandidato ang pagpamayad sa mga botante sa pagsiguro sa kadaugan niini.
Matud pa nila nga magpalabwanay lang ang mga kandidato sa kantidad nga ilang ibayad sa matag botante nga giandam na daan sa matag kandidato sa paghatag sa dili pa ang adlaw sa gikatakdang piniliay.
Dugang pa nila nga panagsa na lamang gayod nga mahitabo karong panahona nga modaug ang kandidato nga wala mogasto og kuwarta alang sa pagpamalit og boto.
Adunay nag-ingon nga sa piniliay sa Mayo niining tuiga ang pagpamalit og boto gihimo usab sa mga kandidato ug ilang giangkon nga adunay nakadaug ug adunay napildi nga namalit usab og boto.
Giangkon hinuon sa pipila ka mga botante nga nakadawat og kuwarta gikan sa mga kandidato nga dili managsama ang kantidad nga gihatag sa mga kandidato.
Ang labing gamay nga kantidad dinhi sa Sugbo nga ilang ibayad sa mga kandidato sagad P100, P200 ug ang labing dakong kantidad ngadto na sa P300 ang kantidad.
Hinuon kataw-an lang sa mga tawo nga modawat og kuwarta dinhi sa panahon sa piniliay sa mga molupyo sa nagkadaiyang kalungsoran sa lalawigan sa Leyte tungod kay ang labing gamay nga kantidad nga dawaton sa mga botante gikan sa mga kandidato mao ang P500 ug ang labing dako kapin pa sa P1,000.
Ang mga pasangil sa pagpamalit og boto gikataho sa miaging piniliay sa Mayo subli na usab nga nasinati sa bag-o pa lang nga nakalabay nga piniliay sa barangay karong tuiga.
Ang wala pa maghupot og katungdanan nga mga kandidato adto nila ihatag ang kuwarta nga ilang gitagana sa ilang pagbisita sa mga panimalay sa dili pa ang adlaw sa pagbotar.
Mao usab ang mga naglingkod sa katungdanan nga sagad sa mga lider mohatag gayod og listahan sa mga botante ngadto sa kandidato nga ang gidaghanon mao usab ang ilang basihan sa kantidad nga ilang ihatag.
Gani sa miaging barangay election adunay barangay kapitan nga ang iyang barangay hall nga gideklarar sa mga structural engineer nga dako og kadaut sa linog ug kuyaw na nga mahugno apan wala kini mahadlok sanglit didto man kini magyampungad sa pagpaabot sa mga botante nga modawat og bayad.
Ang laing kandidato nga kapitan nga nasayod sa gihimo sa incumbent nga kapitan wala kini mosumbong sa Comelec, hinuon nanawag kini sa iyang mga suporter nga adtoon ang barangay hall ug tabangan sa pag-uyog aron mogawas kay mahadlok man nga mahugno sa pagtuo nga naglinog.