Gibutang nako karong buntaga sa sopa ang akong gigunitang ukelele. Nitindog ko kay dunay gustong buhaton. Apan daw giugbok ko sa akong gibarogan. Di ko makalakang. Kay nalimot ko kun unsay akong gilaraw’ng buhaton. Nilingkod na lang ko’g balik. Gipunit ang ukelele. Ug nipadayon sa pagkutingkuting niini. Namasin ko nga akong mahinumduman ang akong nahunahunaang buhaton.
Human na ko sa akong inadlaw’ng hike. Duha ka oras akong hike. Alas siyete na ron. Sabado. Nagpraktis ko sa tapoy sa awit nga Pusong Bato. Kay kun unsay mauyonan nakong kanta nga mo-hit sa air waves, ako man dayong tun-an. Aron matudlo sab nako sa akong apo nga si Fiona, 7 anyos. Hilig og musika si Fiona. Nagtoon og tokar og piano.
Duna na gyud ko’y pagkalimtanon. Bisan kaniadtong bag-o pa kong minyo. Apan karong nangapo na nigrabe. Di kay kasingkwenta na ni nahitabo nako. O sobra pa seguro. Usa ka higayon nga duna ko’y gihapsay nga mga papeles sa ground floor sa among balay (usa man ko ka CPA) miurong ko’s akong gibuhat kay duna’y gustong kuhaon sa taas sa balay. Nisaka ko sa hagdan. Pag-abot nako sa taas, nasugatan nako akong kapikas nga nanilhig sa sawog.
“Unsay imong tuyo dinhi, Rudy?†sukot ni Annie. Niurong og panilhig unya nitutok nako.
Nakapangawot ko sa akong ulo. Wa ko’y ikatubag. Nipahiyom na lang. Kay nalimot ko’g unsay akong kuhaon sa taas. Nibalik na lang sab ko’g kanaug nga way tingotingog. Gikataw-an ko’s akong asawa. Kay nasayod siyang nalimot na sab ko. Hinoon, inig ka taudtaud sa silong, mahinumduman ra sab nako. Kay may kalabutan man sa akong gitrabaho.
Pero karon, grabe na akong pagkalimtanon. Kay naglingkod lang ko. Unya may nahunahunaang buhaton. Nitindog. Pagtindog pa lang nako, nalimot na dayon. Grabe gyud! Duna man god ko’y dayabitis. Ang pagkalimtanon, usa kuno sa komplikasyon anang sakita.
Kay wa pa man ko masayod sa tanang wording o lyrics sa kantang Pusong Bato, ako na lang gi-humming. La la la la la la, La la la la la la la. Ug diha na. Nibalik nas akong hunahuna. Nitindog na sab ko. Nagdali ko’g lakang aron di malimtan ang ako nang nahinumduman. Niduol ko sa bookshelves sa sala. Ug gikuha ko ang Song Book nga bag-o kong gipalit alang ni Fiona. Aron susihon naku kun naa ba sa libro ang awit nga Pusong Bato. Ang ako diay’ng gilaraw, tan-awon nako sa song book kun naa ba ang maong awit.
Ako rang usa dinhi sa sala. Ug wa pay nangmata. Maong gikataw-an ko na lang akong kaugalingon. (Kataposan)