Maria Magdalena

Gula 207

“Sorry, pero dili pa ko makatubag nimo sa pagkakaron,” giingnan ko si Neggar. “Ako pa ning timbang-timbangon.”

Wala mamugos si Neggar. Gihatagan ko niya’g panahon sa paghunahuna sa iyang gisulti nako. Maong gilain na namo ang tema sa among hilisgotan.

Pagkilab sa pipila ka gutlo, ingon sa mikalit lang og karomantiko ang higayon. Kami si Neggar nagpaanod sa bul-og sa among mga pagbati.

Alas tres na sa hapon dihang nanggawas mi sa hotel. Gikan sa hotel nanglakaw kami paingon sa KFC, sa may Jones aron mangaon una usa kami magbuwag sa pagpamauli. Samtang naghulat kami sa among gi-order nga pagkaon, nag-estoryahay kaming duha ni Neggar.

“Gusto kong masayod, Neggar,” nako pa samtang nagpaabot mi sa gi-order namong pagkaon.

“S-sa unsa, Maria?” Misukit si Neggar.

“Kun seryoso ba gyud ka sa imong gi-propose nako.”

Miligdong ang nawong ni Neggar. Mitutok siya nako.

“Nagduha-duha ka ba gyud diay sa katinuod sa akong gi-propose nimo?” Nakapangutana si Neggar nga ingon sa nahisagmuyo.

“Maglisud man gud ko pagtuo mora’g dili gyud katuohan nga may lalaki pang moseryoso sa pagpakigrelasyon nako,” giingnan ko siya.

“Nganong nakasulti ka man og ingon niana, Maria?”

“Wa koy gitago nimo, Neggar. Gitug-anan ko na ikaw sa kaagi sa akong kinabuhi busa nasayod kana nga may malaksot kong kagahapon.”

“Ug unsa may naa niana?” -- Sumpayan pa