Mas maayo bang mangluhod inig isa sa pormas?

Luyo sa kamandoan-hangyo ni Archbishop Jose Palma nga angayang mangluhod gyud ang manimbahay inig abot sa akto sa Pagbayaw sa Pormas sa dili pa ang hugna sa pagpangalawat, nagkabahinbahin gihapon ang matag hunahuna sa kaparian. Hangtod sa pagsulat niining artikuloha, nagpabilin sila nga wala magkahiusa.

Adunay mga pari nga mituman. Ug may ubay-ubay pong wala. Ngano kaha? Dili ba mga buotan man silang karnero nga ginalam sa mga pulong sa Ginoo? Unta, dali ra silang magkasinabot.  Kay sila baya ang lampara sa katawhan. Sila ang giidolo sa mga Romano Katoliko. Busa, dapat lang nga mopanday kanunay og maayong panag-ingnan ang pagkamasulondon sa unsay balaud nga gisangon sa ilang labaw sa simbahan ug labi na sa sugo nga nagagikan sa atong Magbubuhat.

Si Msgr. Jose “Joemon” Montecillo mipahayag nga mangluhod man o manindog, pareha ra basta ang importante nga ang kasingkasing nga modawat, mokalawat  ug mopapuyo sa lawas ni Kristo sa atong kasingkasing, limpiyo. Kay mag-unsa man nang luhodluhod, unya ang mikaon sa sagradong pormas wala’y hugashugas sa ilang kalag? Gipasagdan lang ang lawasnong kahakog sa pagsige’g kupay sa kalibutanong kabuhong nga iyaha ni Satanas.

May punto sab ang higala kong pari. Pero alang baya nako, no, mas maayo gyung mangluhod ta inig isa sa lawas sa atong Manluluwas sa dili pa ang pagpangalawat. Ngano? Nia ang akong rason:

Kun kita anaa sulod sa simbahan, ang atong tumong mao ang pag-ampo. Samot na pag-abot sa Liturgy, diin pagsangko niini ngadto sa Pagbayaw sa Ostiya nga mao ang pagpangagda sa pari: “Kini mao ang lawas ni Kristo. Bulahan ang gidapit alang sa bangkete sa Ginoo.” Busa, angay lang nga mangluhod ta agi’g pagyukbo sa kaluwasan nga gi-offer sa atong Ginoo. Siya baya ning gilansang sa krus, ang pan ug bino, ang lawas ug dugo nga maoy atong kan-on ug imnon. Unya, di ta mangluhod?

Mas nindot man gud nga piniko atong mga tiil samtang mangutana ta sa tagsatagsa nato ka kaugalingon kun angay ba kitang mokalawat sa atong Ginoo, o dili? Anaa sa pagluhod nga madugangan ang atong imahinasyon nga si Hesukristo ania duol kanato, nangagda sa bangkete nga giandam sa Iyang Amahan. Anaa sa pagluhod nga musamot kahugot ang atong pag-ampo samtang nagtutok ta sa lawas ni Kristo nga gibayaw sa pari. Anaa sa pagluhod nga matagamtaman ta ang gamay’ng sakripisyo sa dili pa kita modawat Niya. Gani kun makasala man ang atong anak, ato man siyang paludhon aron makaamgo siya sa sayop nga iyang nahimo.

Ug labaw sa tanan, alang ning tagsulat, anaa sa pagpangluhod nga daw pinale tang gihugasan ang atong kalag sa dili pa kita mukaon sa iyang balaanong lawas. Busa, angay lang gayod nga mangluhod tang tanan pag-abot ning maong yugto sa misa. Apan yuna pa, lisod ba ang pagtuman sa mando ni Archbishop Palma nga mao ang pagpangluhod? Iyaha baya ni sa Ginoo, Bay. Busa, atong sundon, ha? Promise?