Nawala nga ebidensiya

Ah, dili ko motuo nga nasaypan og labay ang maong bag. Ingna hinoon nga gikuha sa imong kaubang pulis!” matud ni Judge Nelson Agwas, huwes sa Regional Trial Court sa lungsod sa Butalog. Gihulbawan niya si SPO1 Armand Waling nga naglingkod sa lingkuranan sa testigo sulod sa husgado. Nisalga ang huwes sa pamahayag sa pulis. Kasamtangang nagpresentar karong buntaga si Public Prosecutor Alan Lugtas, kang SPO1 Waling nga maoy arresting officer sa akusado nga si Leo Agnos. Sa pagsugod og pangutana ni Prosecutor Lugtas sa testigo alang sa direct examination, nasayran sa huwes ang hinungdan nganong naarestar si Leo ug nakasuhan og paghupot og illegal nga drugas.

Usa ka sayong hapon niresponde si SPO1 Waling sa alarma nga dunay nanghagis, mamato ug namaregla sa daplin sa karsada duol sa waiting shed sa barangay Notaso. Pag-abot ni SPO1 Waling ug iyang partner nga si PO1 Greg Gango, sakay sa patrol car, sa may waiting shed, nakita nila nga nidagan si Leo. Gigukod ni Armand. May gilabay nga bag si Leo. Gidagan ni Greg ug gipunit. Naapsan ni Arman si Leo ug giarestar. Unya wa na lang siya makasuhi sa pagpanghagis, pamato ug pamaregla. Kay way nikiha. Kay may sulod nga tulo ka sashe nga shabu ang bag, illegal drugs ang nakaso batok ni Leo.

Tungod sa ka hinay motuyok ang ligid sa hustisya, naabtan og tuig una nabista ang kaso ni Leo. Unya matud pa ni Armand nga nawala ang bag ni Leo sa ilang police office. Kay nasaypan og labay sa diyanitor nga nanglimpiyo sa ilang opisina. “Gibutang ra man gud to ilawom sa akong lamesa, Your Honor,” pasabot ni Armand. “Sentido kumon ray gikinahanglan ana. Kadto ebidensiya sa krimen. Kay gisudlan sa kontrabando. Dapat duna moy officer-in-charge sa mga ebidensiya. Ug duna sab moy tukmang butanganan o tagoanan sa mga ebidensiya. Dili kay ibutang lang ilawom sa lamesa. Mora ma’g haguka mo sa inyong katungdanan isip law enforcement officer,” sa huwes. Nakaduko si Armand. Nitan-aw sa iyang mga sapatos. Naghulat na lang siya’g motingog ang public prosecutor aron pagdugang og mga pangutana. (Kataposan)