Pagsulay sa kinabuhi - Gula 5

Nakabantay ang mga kauban ni Terio nga nagsige siya’g pasiklap sa babaye nga didto sa pikas lamesa nga wala nila mahibaw-i nga girlfriend kini sa ilang amigo. Usa lang sa grupo nga suod kaayo ni Terio ang iyang gitug-anan.

“Mora’g naka-like ka anang babaye nga anaa sa atbang lamesa Ter no?” gikomedyahan si Terio sa iyang mga kauban nga wala gayud masayod sa tinuod nga estorya. Dali sila nga gikiloan ni Delfin aron mohunong sa paghimo’g komedya. Kalit nangahilom.

Miduko si Terio ug milikay na nga mopasiklap kang Bella, apan kaambakon na gayud ang mga luha gikan sa iyang mga mata. Iyang gipaninguha nga kapugngan kini aron dili gayud siya makahilak.

Gibuhian niya ang halawom nga pagpangagho. Pagtan-aw pa ni Terio, wala na sila si Bella sa ilang gilingkoran. Pabiling nagpakahilom ang iyang mga barkada nga naniid lang kaniya. Nagpakisayud sila kang Terio mao nga iya kining gisuginlan sa iyang kaagi.

“Mao diay nga mora’g seryos kaayo ka ganina Ter. In-love pa gayud diay kaayo ka niya no? Kanindot kaha kun makakita ko’g lalaki nga ingon kanimo mahigugma,” nangomedya na usab si Cynthia, ang laing batan-ong engineer sa grupo.

Laing kahilom ang mihakup sa grupo. Taudtaud. “Mo-resign tingali ko sa trabaho mga part. Dili ko mahimutang nga anhi gihapon sa dakbayan ilabi na nga dili kalikayan magkakita kami ni Bella kay silingan ra gud mi’g balay,” matud ni Terio.

Gitambagan si Terio sa iyang mga higala nga timbang-timbangon pag-ayo ang iyang nahuna-hunaan. Mitambag pa gani si Cynthia nga kalimtan lang si Bella kay daghan pa nga mga babaye ang mahigugma kaniya.

Apan inay maminaw sa mga tambag, wala na gayud kapugngi pa ni Terio ang iyang gibati. Mibakho siya nga daw usa ka babaye ug mihukdong sa lamesa nga mora’g bata nga giilogan sa iyang duwaan.

Gihapohap ni Cynthia ang buko-buko ni Terio ug gialam-alaman. Daan na nga nakamatikud si Terio nga si Cynthia daku kaayo og gusto kaniya. Maanyag si Cynthia apan wala gayud magpatintal si Terio tungod kay matinud-anon siya sa iyang panumpa kang Bella.

“Pastilan part, kun ako pa ang anaa sa imong lugar, kalimtan ko na kadto si Bella kay total... naa si Cynthia nga buotan ug gwapa pa g’yud,” matud ni Efren. “Gawas nga buotan ug gwapa, engineer pa,” dason ni Cardo nga bugtong architect sa grupo.

Miginhawa’g lawom si Terio ug sa makausa pa, nanghupaw na ‘sab. “Buyno, dili lang usa ko mo-resign mga part... apan mohimo ko og emergency leave sa trabaho. Mobakasyon sa ko sa amo sa Mindanao,” giingnan ni Terio ang mga barkada. - Sumpayan