Pagsulay sa kinabuhi - Gula 3

“Gitug-anan ko ni Bella nga giingnan siya sa iyang mga ginikanan nga palikayon na nimo Ter,” matud sa higalang babaye ni Terio nga suod usab ni Bella. Nakapangagho si Terio ug nakapangawot sa iyang ulo nga nakadungog.

Milabay ang mga adlaw, wala na makakita pa si Terio nga mogawas-gawas sa ilang balay si Bella. Mora’g nakabantay siya nga gipahunong kini og tungha sa iyang mga ginikanan.

Kun wala’y klase si Terio, ang kanunay niyang himoon mao ra ang pagsige’g lantaw sa balay nila ni Bella sa unahan. Usa ka hapon niana, nakagawas ang podol nga iro nila ni Bella gikan sa gate sa ilang balay.

Nakita niya nga migawas si Bella ug gigukod ang iro. Didto na kini madakpi atubangan gayud sa balay sa maguwang ni Terio. “Bella! Bell!,” midali pagsinggit si Terio ug miduol unta sa dalaga apan si Bella midali’g balik sa ilang balay.

Karon, nakasabot na si Terio nga naglikay na kaniya si Bella. Hoyhoy ang abaga ni Terio nga mipauli sa balay sa iyang maguwang-babaye. Kahilakon siya nga naghuna-huna nga gilikayan na siya ni Bella.

Kalit lang ‘sab nga misakdap sa iyang huna-huna ang gitug-an sa iyang amiga nga gipakuha sa mga ginikanan ni Bella ang gisabak niini nga bunga sa ilang pagminahalay.

Daw naluya si Terio nga naghuna-huna. Nagmahay siya ni Bella nga nagpadala sa hulhog sa iyang mga ginikanan. Alang kaniya, haguka ra diay kaayo ang iyang pagbati kay nadala man siya sa paghulhog.

“Ayaw pagpadala anang imong gibati Terio. Padayona ang imong pagtungha kay asa ra man unya kanang babaye kun mahimo ka na nga professional, graduating ka na gud,” tambag sa iyang maguwang-babaye.

Engineering ang kurso ni Terio ug anaa siya sa Dean’s list. Nagpasabot nga utokan siya nga pagka tinun-an. Ang nakaapan lang kay kabus siya og kagikan. Usa gani tingali kini sa rason nga wala siya magustoi sa ginikanan ni Bella.

Usa ka Domingo, swerte kaayo kay samtang didto sa tindahan si Terio, nakita niya nga nagpaingon usab si Bella sa tindahan nga mora’g dunay paliton, apan pagkakita kaniya kalit kini nga mibalik.

Gisakitan kaayo si Terio nga nakakita sa gihimo ni Bella. Iyang nasabut nga gi-itsapwera na gayud siya sa iyang girlfriend. Wala niya kapugngi ang paglugmaw sa iyang mga luha.

Milabay pa ang mga adlaw, semana ngadto sa mga buwan nga pag-antos ni Terio. “Pangita’g laing babaye Terio, ayaw pagsige’g handom sa babaye nga wala na’y gusto nimo,” tambag sa iyang maguwang.

Daghang mga gwapa sa mga classmate ni Terio apan dili niya mailisan si Bella sa iyang kasing-kasing. - Sumpayan