HUBAD SA DAMGO

Dear Professor Tata Swami,

Pahubad ko sa akong damgo nga naay namalit  og load sa ako dayon dugay nako nakuha ang bayad sa usa sa namalit kay tungod daghan man sila. So gikuha sa usa  ka customer ang bayad ug gitunol diri sa akong tuong kamot, nahibung ko sa sakit man pagkatunola niya kay mao diay ang kuwarta naay apil nga blade nga nataop jud gamay sa akong pad, pinaduot man sad pagkatunola gud sa batan-on. Ug sunod nako nga gidamgo kay nakamata daw ko sa pagkatog namo sa akong pag-umangkon kay naa may mura’g kusog kaayo  nga nibuga og aso ug siga sa among bintana nga jalousy sus paglili nko ang nibuga og aso ug siga kay mananap man nga panther. Unsa kahay pasabot ana proof noh? Daghang salamat, magpaabot ko.

—Antoinette

Antoinette,

Una sa tanan, salamat kaayo sa perming pagsunod ning atong pagpanghubad sa damgo ug awom. Kini imong damgo, dili gyud maayo! Naay tawo nga dako kaayo og kasuko diha kanimo o’ sa imong banay. Mangita gyud ni siya og paagi nga masugamak ka sa kalisod aron magkatawa siya! Katong blade nga nitaop gyud sa imong pad, mao to ang kaligutgot, kasuko ug kapungot nga gibati diha nimo. Mangutana ko, naa kay uyab nga gibiyaan ug gipulihan og lain? Or naa bay naibog sa imong uyab o’ bana kung minyo man gani ka, nya gusto kaayo nga mawagtang ka. Pagbantay sa mga maluibon nga mga tawo nga maayo lang kaayo sa imong atubangan ok? Kanang aso sa imong damgo, mao na ang nagpakaaron-ingnon nga maoy nitabon sa tinud-anay nga batasan kay paglili pa nimo, panther man diay! Pag-amping ug pag-ampo kanunay aron dili ni moduot ning mga klaseng mga tawhana nga way laing mabuhat sa kinabuhi kundi ang pagdaut sa ilang isigkatawo.

Amping!

Prof. Tata Swami

D' Swami (Descendant of Professor Swami)

Facebook page: https://www.facebook.com/BeyonddreamsBYdswami

Group page: https://www.facebook.com/groups/beyonddreams.swami/

* **

Atangi ang Hubad sa Damgo matag Miyerkules ug Sabado dinhi lamang sa Banat News. Alang sa inyong pangutana kabahin sa kahulogan sa inyong damgo, ipadala kana ni Tata pinaagi sa: [email protected].