Sakgaw nga makaayo

 â€œBuanga, Bay! Sa Sabado, nakainom lang ko’g upat ka gagmay’ng botelya sa beer gihubak man ko!” ni Jessie, freight clerk sa MCD Forwarders, ngadto sa iyang tupad sa tuo nga laing freight clerk.

Adlaw’ng Lunes ron. Bag-o pang nangabli ilang opisina karong buntaga. Untop alas otso sa buntag ang takna.

Sila pang duha ni Peter ang mga freight clerk. Usa ka desenteng hamtong lalaki ang unang customer nga niduol sa counter tungod ni Jessie. Sa pagdawat ni Jessie sa package nga gipatan-aw niya kun pilay bayranan sa pagpadala, nalibkas sa iyang baba iyang gisulti. Aron pagsugod lang og kolokabildo ngadto lang unta ni Peter. “Wa pa man kaha kay singkwenta?” sagbat sa customer nga sayisintahon na og hitsura. Nagbarog atubangan ni Jessie.

“Singkwenta i dos, na ko” ni Jessie nga nipahiyom. Nitubay na lang siya’s tawo kay nakadungog man sab sa iyang gisulti. Ug si Peter wa man lang nikomentaryo sa gisulti ni Jessie.

“Angay na gyud tingale nga paundangon ka na’g inom”, sa tawo.

“Ngano man sir?” ni Jessie.

“Pagtongtong gyud nako og singkwenta, naospital dayon ko tungod sa dayabitis. Mao na akong gibati. Mora ko’g gihubak. Nigilok og maayo akong tutunlan. Ang paggilok sa tutunlan, usa na sa simptoma sa dayabitis’ sa tawo. “Mao ba, sir? Ah mag-under time lang ko rong adlawa. Magpa-tsek up ko sa akong blood sugar” ni Jessie. Gikulbaan.

Maayo gyud imong hukom. Kay kining atong bisyo, sa lawas ra man gyud pauli. May lawas nga di dayon madaut. Apan kon madaut na gani, angay gyud wad-on ang bisyo. Labi na’g gusto pa tang malugwayan atong kinabuhi” sa tawo.

“Pila na ka ka tuig nga wa nay inom og ilimnong makahubog?” ni Jessie.

“Pito na ka tuig. Soft drinks ug bino, wa na gyud. Ug wa na gyud ko’y planong mobalik pa,” sa tawo.

“Salamat sir sa imong pagsagbat. Hinaut nga makaya sab nako ang imong gibuhat,” ni Jessie.

“Kayaha gyud. Kay ang makadali’g bugto sa kinabuhi kanang balik-biya, biya-balik sa bisyo. Kun mobiya ka, biya gyud sa hingpit”, sa tawo.  Seryoso. Ug gisugdan ni Jessie og compute sa calculator ang bayranan sa gipadala sa tawo. (Katapusan)