“In-Love”

Nag-inusara na lang si Avel didto sa lamesa nga iyang nahimutangan kay ang tanan niya nga mga kauban nalingaw kaayo pagsayaw atul sa usa ka salo-salo nga ilang gitambongan.

Nagkalingaw na lang siya pagsud-ong sa mga nanayaw. Nadapit ang iyang panan-aw niadtong usa ka maanyag nga babaye nga kanunay’ng mapahiyumon ug angayan kaayo nga mosayaw.

Apan anugon kay maglisud si Avel pakighigala sa maong babaye kay dili man siya mosayaw. Nakahukom na lang si Avel nga mouna na lang pagpauli sa iyang mga barkada mao nga mitindog siya aron duolon ang iyang mga kauban.

Pwerteng lipaya sa mga kauban ni Avel kay nagtuo nga moapil na pagsayaw ang ilang higala. Apan igo lang si Avel nga mihunghong sa iyang mga higala nga mouna ra siya pagpauli.

Sa dayon na nga paggawas ni Avel sa grupo nga nanayaw, nagkasugat ang ilang panan-aw ug niadtong gwapa nga babaye. Gipahiyoman kini ni Avel ug mibawos ‘sab pagpahiyom ang babaye kaniya. Nakiglamano si Avel sa babaye kinsa nakigpares lang og laing babaye sa pagsayaw. “Angayan ka kaayo mosayaw, bilib kaayo ko,” giingnan ni Avel ang babaye nga igo lang nga mipahiyom.

Migawas g’yud si Avel sa party area ug hinay’ng milakaw paingon sa giparkingan sa iyang awto. Apan wala dayon siya mobiya, nagkalingaw usa si Avel sa pagpaminaw og music sa usa ka FM station, unya mikuha sa iyang selpon.

Madungog pa ni Avel gikan sa sulod ang lanog nga tugtog sa music gikan sa kwarto nga didto gihimo ang party. Apan paglabay sa mga dies minutos, nahunong na ang tukar. Taud-taud nag-ulhos-ulhos lang pagpanggawas ang mga mitambong sa party.

Gikan sa sulod sa kotse ni Avel, iyang gitan-aw ang mga nanggawas gikan sa kwarto nga gihimoan sa party. Kalit nga gikulbaan si Avel kay nalantawan niya sa unahan kadtong gwapa nga may kaubang laing babaye.

Paingon kaniya ang ilang rumbo mao nga wala’y pumamilok si Avel nga mitutok sa babaye. “Gwapa g’yud da,” nakapanglad-ok sa laway si Avel. Wala masayop si Avel, ang sakyanan diay nga giparking tupad sa iyang kotse maoy rumbo sa babaye.

Managsama ra ang model sa ilang mga awto, kun wala siya masayop, Model 2000 pa. Naniid lang si Avel kay bisan tuod nagkalamano sila didto sa sulod, apan wala sila magkaila-ila mao nga gidaug siya’s kaikog.

Kadtong gwapa nga babaye maoy milingkod atubangan sa manobela. Nadungog ni Avel nga bisan giunsa sa pagpa-start wala gayud moandar ang sakyanan. Migawas ang mga babaye ug nagpanglantaw.

Dihang tungora nga migawas ‘sab si Avel gikan sa iyang kotse. “Wala g’yud moandar miss?” -- Sumpayan