Maria Magdalena

Gula 186

Nasayran nako nga sugarol diay si Bob ug kada-adlaw’ng Domingo anaa siya kanunay sa buwangan ug tigbakay.

Gawas sa iyang pagkapalahubog ug pagkasugarol, ang dili nako madawat ug akong gikabalak-an pag-ayo kay akong nadiskobrehan nga tiggamitan siya og shabu.

Bisan sa akong mga kabuang kaniadto apan wala gyud nako sudli kining maong bisyoha.

“Tiggamitan diay ka ini?” Nakapangutana ko niya dihang mihithit siya’g shabu human sa among pagtagay sa lawasnong kalipay sulod sa akong kuwarto sa balay nako sa Ginatilan.

“Oo,” laktod niyang tubag. “Ginagmay lang gud. Pakondisyon.”

Wala ko makatingog. Igo lang kong mitutok ni Bob nga nagunit sa aluminum foil ug nagsige og singhot. Mora’g maglisod ko pagtuo nga usa diay siya ka adik. Buotan man gud siya’g hitsura. Dili mailhan nga naulipon siya sa dautang bisyo.

“Gusto kang motilaw?” Gipangutana ko ni Bob. “Ha-ha?” Nahakanga ko. “A-aw, d-dili ko, uy. Ikaw lang diha.”

“Mas maayong motilaw ka usab niini, Maria, aron mosamot ang imong kondisyon ug kaagresibo sa sex. Mas molami unya ang atong labinglabing.”

“U-unsa?”

“Sige na. Tilawi ni. Akong ipasalig nga di ka magmahay kun matilawan mo kini.”

Sa sinugdan, nagduhaduha ko. Pero sa kadugayan, nadala ra gyud ko sa pagsige’g apura ni Bob nako. Maong nitilaw ko. -- Sumpayan pa