Bugwal

Bangon na Dong Kardo aron masugdan mo na sa pagbugwal ang atong luna!” Nahipugwat ko gikan sa lawom nga pagkatulog dihang miulbo sa akong pandungog ang singgit sa akong asawa nga si Myrna. Midali ko’g bangon ug milingkod sa ngilit sa  katre. Unya gitan-aw ko ang gawas. Nakita kong namasibas na ang kahayag sa adlaw. Nanghuyatid ko.

“Pagdaliiii!!!” Misinggit na sab ang akong asawa. Mibarog dayon ko ug milakang paingon sa kusina. Ug sama sa naandan, nagdungan kami si Myrna sa pagpamahaw.

Tulo pa lang ka bulan ang panag-ipon namo ni Myrna. Mao man goy nasabotan sa among mga ginikanan nga mag-ipon lang una kami tungod kay dili pa hingkod ang among pangidaron. Dise sayes anyos pa lang kaming duha. Mabdos man gud si Myrna maong napugos kami sa paghimo niini.

Nagtungha kami si Myrna sa usa ka tunghaan sa hayskol nga iya sa gobyerno diri sa bukirang dapit sa Dalaguete ug klasmit  sab kaming duha. Anaa na unta kami sa ikaupat nga ang-ang sa hayskol apan miundang si Myrna sa pagtungha tungod sa kaulaw sa iyang pagsabak ilabi na kay daghan sa mga estudyante ang kusog mobiaybiay ug molibak kaniya. Miundang na lang sab ko sa akong pag-eskuyla tungod niini kay nahadlok kong makabuhat unya og dautan.

Human sa among pamahaw gidumdom ko dayon ang piko nga gipahuwaman sa amahan ni Myrna kanako ug gidala kini ngadto sa luna nga gihatag nila aron among matikad ug matamnan. Dihadiha gisugdan ko dayon ang pagbugwal sa yuta ginamit ang piko. Sa matag karon ug unya, mohangos ko sa kakutas ug magpamahid sa mibul-og kong singot apan gikinahanglan gayud nga ako kining buhaton aron matamnan na namo kini kay nagsingabot na ang ting-ulan. Dili man gud mahimong darohon ang maong luna ginamit ang kabaw kay naa kini mahimutang sa kilid sa bukid ug hilabihan ang katungason.

Usa ka adlaw, kalit nga mibutho sa among balay si Noy Islaw nga among silingan kinsa taudtaod nang nagtrabaho sa siyudad sa Sugbo ug giagni ko niya sa pagkuyog kaniya aron motrabaho sa iyang gitrabahoan. Nagkinahanglan kuno sila’g trabahante nga sama nako nga kugihan ug dako’g lawas. Pwera buyag lang, midako gyud ang akong lawas tungod sa kanunay kong pagbugwal sa yuta. Gikalipay ko kaayo kini busa giduol ko dayon si Myrna kinsa nanglaba niadtong higayona didto sa tabay ug gisultihan.

“Mokuyog ko ni Noy Islaw sa Cebu, Day Myrna, kay gusto kong motrabaho didto. Gikapoy na man gud ko’g binugwal dinhi!” Tugob sa tumang pagpaubos ang akong tingog.

“Sige! Gikapoy na man kaha kag binugwal sa yuta adto na lang sa Cebu panrabaho. Sigurado man gyud kaha kang makatrabaho dayon inig-abot nimo didto nga wala ka ra makatapos sa hayskol? Ni Myrna pa sa tingog nga may sambog nga kabalaka.

“Mao kanay iyang gipasalig nako, Day Myrna. Ug ayaw lang og kabalaka kay siya ra sab kuno ang bahala sa akong kapuy-an!” Nako pa dayong gakos kang Myrna ug gipatikan ko’g halok ang iyang mga ngabil. Ug niana dayong adlawa, mibiyahe kami si Noy Islaw paingon sa Cebu City. Ug paghiabot gyud namo, gidala dayon ko ni Noy Islaw sa ilang opisina  ug gipaynal ang tanan alang sa akong trabaho.

Pagkaugma. Nagpanon dayon kaming tanang trabahanti nga naglakip na kang Noy Islaw paingon sa dapit nga among trabahoon. Paghimuntog namo sa usa ka bakanting dapit nga duol sa dagat, gitunol dayon ni Noy Islaw kanako ang usa ka piko.

“Unsaon man na nakong piko, Noy Islaw?” Nangutana ko kang Islaw ug wala ko dawata ang gitunol niyang butang.

“Magsugod na tag bugwal sa yuta ug bato dinhi sa SRP, Dong Kardo, kay magtukod ta’g bilding dinhi!” Tubag ni Noy Islaw kinsa mipahiyom samtang mitutok kanako, “Bag-o ning proyekto sa konstraksiyon natong kompaniya!”

Milingolingo ko ug nanghupaw. Unya gidawat ko na lang ang piko nga iyang gitunol kanako! (Kataposan)