Mangige sa asawa

Dear Tita Salie,

Maayong adlaw. Tagoa lang ko sa pangalan nga Iza, usa ka minyo ug dunay mga anak. Ang nakahasol nako karon, Tita, mao kining akong feelings sa akong uyab sa una.

Dili man gud siya ang akong gikadayon, Tita. Ug una siyang na minyo kay kanako. Unya naminyo pud ko sa lain, ug duna ko’y anak nga 2 ka buok.

Kini man gong akong uyab sa una nga minyo na usab, magsige man siya og paduol nako. Unya mopakita siya og concern diri nako, Tita. Unya ganahan ra ba pud ko sa iyang gibuhat ug gipakita nga concern. Unya sige ko niya hatagan og makaon, ug ako usab kining dawaton.

Nahasol nako, Tita, tungod kay karon gusto na man ko nga makit-an siya kada adlaw. Magpangita na man ko niya maoy akong gusto nga makit-an siya kanunay. Pero pareho na baya mi nga minyo, Tita. Mao nga nagproblema na gyod hinuon ko og maayo.

Ug ako usab namatikdan, Tita, nga mangige na man hinuon ko sa iyang asawa. Maglagot ko nga makakita nilang duha nga magkuyog.

Nasayod ko nga dili husto ang akong na feel, Tita. Apan wala gyod ni nako tuyoa. Unsa may akong buhaton, Tita? Palihug pasabta ko. Daghang salamat and God bless you always.

* * *

Dear Iza,

Kun imong na-realize nga mora’g naghinayhinay pagbalik ang imong feelings ngadto sa imong uyab, nasayod ka na gyod nga dili na maayo  ug dili na husto kun imo pang tubayan ang maong feelings tungod kay pareho namo nga duna nay mga tag-iya ug pamilyado. Busa dili na gyod makaayo kaninyo kun padayon pa ka nga moduol kaniya. Kun dili molikay ang imong uyab, ikaw na lang ang dapat molikay. Ayaw huwata nga mabantayan pa ka sa imong pamilya o sa imong bana. Ayaw paabota nga duna pa’y eskandalo nga mahitabo sa inyong tagsa-tagsa ka pamilya ug una pa kamo makaamgo nga ang inyong gibuhat dili maayo.

Wala gyod kay katungod nga mangige sa asawa sa imong uyab sa una, tungod kay dili ikaw ang asawa. Dili na tarong nga panghunahuna kun na-inlove ka pa kaniya nga duna na man siya’y pamilya. Mosugot ka ba kun atong balihon ang sitwasyon, kun ang imong bana gikilig ug naibog pa sa laing asawa? Unsay imong bation kun imong nahibaw-an nga ang imong bana gihatagan og makaon sa iyang uyab sa una? Kun imo kining ikasuko, pwes, normal or natural lang usab nga mao kini ang bation sa imong bana kun mahibaw-an ka niya.

Busa likayi ang maong lalaki ug hunonga na ang imong pagdawat sa iyang gihatag tungod kay nasayod ka kun unsay buot ipasabot niini tungod kay duna moy kagahapon. -- Tita Salie