Ang hari

Si Leo ang labing maayo nga barbero sa ilang baryo. Daghan siya’g suki. Abli iyang barber shop kada adlaw. Gikan sa alas nuybe sa buntag hangtud sa alas nuybe sa gabii o lapas pa, depende sa customer. Labing daghang magpatupi niya sa adlaw’ng Domingo. Maglinya ang mga customers. Usahay, mag-ilog kun kinsay mouna. Niining higayona, mahasol usahay si Leo kun unsaon niya paghusay iyang mga suki.

Alas 10 sa buntag. Adlaw’ng Domingo. Kasamtangang nagtupi si Leo ni Tibong, usa ka manananggot. May tulo pa ka customer nga naghuwat. Naglaray sila’g lingkod sa taas nga lingkuranan nga daw sopa dikit sa bongbong sa barberiya.

Ang kinadaplinan dapit sa too,maoy nag-una. Si Loloy, usa ka mag-uuma ang nag-una. Sunod, si Abay, usa ka panday. Ang ikatulo si Anas nga usa ka mananagat. Walo ka tawo ang makalingkod sa bangko.

Unya may niabot nga tulo pa ka laing customers. Sila si Danny, usa ka abogado; si Allan usa ka enhinyero; ug si Maria usa ka doktor.

“Linya lang mo, attorney, engineer, doc, kay naa pa may nauna kay kaninyo” ni Leo sa malumong pulong nga mapahiyomon.

“Ah, kinahanglang tagaan gyud mig’ special treatment. Kay mga propesyonal man mi. Dapat paunahon gyud mi,” ni Danny.

“Unsa may ikasulti ninyo, Loloy, Abay ug Anas?” ni Leo. Nagsigi’g makinilya sa buhok ni Tibong.

“Sige, paunaha lang na sila,” nila pa nga nanagminghoy ug mapaubsanon.

Nisurok ang dugo ni Leo. Kay gusto unta siya nga mobaro’g silas Loloy, Abay ug Anas sa ilang katungod.

“Ako lay magbuot kay ako may barbero. Ako roy hari kay nia man mo sa akong barberiya. Nia mos akong poder. Kamong mga propesyonal, ayaw lang mo palabi og pataas. Kay bisa’g naa moy degree o lisensiya, dili sab mo kamao sa abilidad sa ubang tawo nga dili propesyonal. Kamo sang may abilidad nga dili propesyonal, ayaw sab ninyo usba ang pagtan-aw sa kaugalingon. Ayaw ikaulaw ang inyong abilidad. Ayaw lang sab ipanghambog. Kay daghang propesyonal nga dili kamao sa inyong abilidad. Busa, patas ra ang tanang tawo. All men are created equal. Mao nay akong prinsipyo. Busa, linya lang sab mo, attorney, engineer ug doc’ ni Leo.

Nahisagmuyo ang tulo. Nag-ukon-ukon og duol sa lingkuranan nga taas, nga dako pag bakante kay tulo ra ka tawo ang nanglingkod.

“Apan kun dili mo kahuwat, daghan pa mang laing barber shop. Naay sa kilid sa videokehan ni Eddie. Naay sa kilid sa karenderya ni Kika. Ug naa say tupad sa tindahan ni Eloy. Sa akong tan-aw, di ra mo kinahanglang molinya didto,” dugang ni Leo.

Naglumba og lingkod ang tulo ka bag-ong abut. Nasayod silang si Leo ra gyud ang makatupi nila sa estelo nga makauyon sila’s resulta.

“Ang ako lang ikatambag ninyo nga ampingi ang inyong propesyon o abilidad. Dawata inyong abilidad. Kay mao nay inyong kapuslanan ug kabuhian sa katilingban. Akseptaha kun kinsa o unsa ka. Unya, be the best of what you are. Ug ang swerte makab-ot ra o moabot ra ninyo” ni Leo.

Niyangoyango ang unom. Di kayango si Tibong kay gitupihan. Apan dako kaayo’g pahiyom.

Gipaspasan ni Leo ang ulo ni Tibong kay human nag tupi. Gimasahean niya ang abaga ug liog. Gihukasag kopo ug gipatindog. Mapahiyomon si Tibong nga nihapuhap sa iyang buhok nga semi-opaw. (Katapusan)