Grasya nga wa damha

Wa kapugngi ni Atty. Manny Indig nga manampiling karong buntaga sulod sa iyang bupete. Duha gyud ka palad iyang gisawod sa iyang suwang. Samtang naghukdong ibabaw sa iyang lamesa. Problemado siya sa kuwarta. Kay duna na iyang  anak sa kolehiyo. Enrollment na sab.

Unya wa na sila kapalit og tambal sa dayabitis alang niya ug sa iyang kapikas nga si Nimfa. Naputos na si Manny sa utang. Tanan niyang mga kliyente napangayoan na niya’g advance attorney’s fees sa mga kasong wa pa nahuman.

“Tok! Tok! Tok!” May nanoktok sa pultahan. “Ablihi kono Nimf” ni Manny ngadto’s iyang kapikas nga mao ra say iyang sekretarya. Giablihan ni Nimfa. “Maayong buntag, attorney” sa hamtong nga tawo nga nagbarog sa pultahan. Wa na kaila si Manny sa tawo. “Kinsa kadto ka bay?” ni Manny. “Si Conrado bitaw ko, attorney. Kadtong imong linabanan nga na-abswelto” niya pa nga mapahiyomon. “Husto!” tuaw ni Manny sa hilom. Nahinumdum na siya ni Conrado. Apan naluya si Manny. Kay nia na sab seguro ning tawhana. Unya di kabayad og abogado ning kliyenteha.

Nakiha og illegal possession of firearm si Conrado. Sobra 15 ka tuig na ang nakalabay. Bag-o pang abogado si Manny adtong higayona. Wa kapiyansa si Conrado. Unya kun magpreparar sila sa kaso, si Manny ang moadto sa prisohan. Mahadlok unta siyang mosulod og prisohan. Kay basi’g maatlan nga may mga prisong mag-riot sa sulod. Apan tungod sa iyang trabaho, napugos na lang og sukol sa  iyang kahadlok.

Sa kada bista, si Manny pa usahay makagasto sa ilang snacks ug iyang pamelete. “Ilista lang akong bayranan nimo, attorney. Kun makakuwarta lang ko, mobayad dayon ko nimo. Kun dili, Diyos na lay magbawos sa imong kaayo” ni Conrado. Pagkatinood, nanglaban lang siya’g libre aron makasinati og tinood nga kaso.

“Wrong timing man imong pag-abot, Conrado. Wa man ko’s kondisyon rong buntaga” ni Manny nga nagpaluyaluya og tingog. “Di wrong timing, torni. Karon kay nia ko, good timing” ni Conrado nga malipayong nisulod ug nilingkod sa lingkuranan dikit sa atubangan sa lamesa sa abogado. “Unsa na man say kaso nimo ron?” ni Manny. “Wa koy kaso, torni. Nia ko aron pagbayad sa akong utang” ni Conrado. “Wa kay utang nako oy!” ni Manny. “Aw  man kaha?. Isipa lang ning regalo nako nimo” ni Conrado nga nitunol og tambok nga sobre sa abogado. Gibutang ni Conrado ibabaw sa lamesa. “Sige, adto na ko torni” ni Conrado. Nigawas.

Gilili ni Manny ang sulod sa sobre dihang nakagawas na si Conrado. Nitulo iyang luha sa kalipay. Bayente mil pesos ang sulod sa sobre.” Sangko gyud sa langit atong kalipay kun makadawat tag grasya nga wa damha!” ni Manny nga nagtunol sa sobre ngadtos iyang kapikas. “Maniudto tag restawran, ron. Dugay na man tang wa kakaon sa gawas” ni Nimfa nga nahimuot sab pag-ayo. Hilom nga nagpasalamat sa Diyos. Siya ang cashier ug treasurer sa ilang pamilya. (Kataposan)