Kakugi sa bata

Alas-4 pa gani sa kaadlawon, didto na si Mina sa Unit-One Carbon Market nga naghatod ug nag-apud-apud sa mga kopya sa Banat News sa tanan niyang mga suki nga nanag-iya og stall nga tindahan sa karne ug mga isda.

Tag-300 ka mga kopya sa Banat News ang mahurot niya matag kaadlawon. Sa edad nga 12 ug usa ka batang babaye, magbaguod sa paglukdo si Mina sa mga kopya sa Banat News nga iyang kuhaon sa suki niyang distributor sa Banat News.

Dako ang kalipay ni Mina  nga sa iyang pagka-newsgirl sa Banat News matag kaadlawon, aduna siya’y peso matag kopya niini. Dali ra kaayo siya makakuwarta og 300 pesos mata’g kaadlawon.

“Biliba gyud nako sa imong pagkakugihan, Day Mina, uy! Lalim bay nakabaton ka’g 300 ka mga suki sa Banat News sa Unit-One Carbon Market!” matud sa edarang lalakeng distributor og Banat News ngadto kang Mina.

“Kayod gyud ko, Sir! Aron makatigom ko og duna koy alawans sa pag-eskuyla nako sa Grade Six sa publikong eskuylahan, kay silas Papa ug Mama, pulos lang basurero ug basurera...!”

Sa pagtungtong ni Mina sa edad nga 7 ug Grade One pa siya, nagsugod na siya sa pagpanuroy  og Banat News sa ilang eskuwater nga barangay sa siyudad, aron lang makakuwarta. Nag-ilaid sila sa kakabos, tungod kay nagpakabuhi lang sa pagpamunit og mahalin nga basura ang iyang mga ginikanan. Nabatonan niya ang hiyas sa kakugi isip bugtong anak.

Human og pangobra ni Mina sa mga bayad sa tanan niyang mga suki sa Banat News dumdumon na sab niya ang suking tiggama og budbod ug biko, nga alas-4 pa sa kaadlawon, magdisple na usab diha sa aseras sa Carbon Market. Moangkat siya og usa ka gatos ka budbod ug laing usa ka gatos ka biko. Pahulamon siya og dakong basket sa tag-iya sa budbod ug biko nga maoy iyang sudlan sa iyang inangkat ug isuroy sa iyang mga suki nga manindahay og mga prutas ug utanon.

Inigka-alas-6 sa buntag, mahurot na ang tanang tinda ni Mina, dayon moremit siya sa iyang halin sa Banat News ngadto sa suking news distributor sa dalan Colon.

Ug matag buntag, gumikan sa tumang kakugi, molimpiyo gyud si Mina og kinintos pesos nga kinitaan. Makapalit pa siya og kinilong bugas ug kinilong isda alang sa ilang  kunsumo matag adlaw. Hilom nga nakadayeg kaniya ang basurero ug basurera niyang mga ginikanan.

“Basta magkugi lang gyud diay diha sa tinarong nga paagi, mabuhi gyud diay ang tawo, mabata man o matigulang!” nagkitabkitab ang baba ni Mina ug mapahiyumon nga gitutokan niya ang iyang bankbook sa BPI Family Savings Bank, nga tulo na ka tuig niyang gisugdan paghulog sa inadlaw niyang kinitaan, nga way kasayuran niini ang iyang  Papa ug Mama. Panagana kini ni Mina sa galastohan sa pagpadayon niya’g eskuyla sa hayskol ug kolehiyo, alang sa katumanan sa batan-on niyang pangandoy nga mamahimong malampusong propesyonal, ugma damlag. (Kataposan)