Silot sa kinaiyahan

Nangamig ang hangin nga misapigad sa akong panit apan wala ko kini panumbalinga. Giantos ko ang tumang katugnaw samtang nagtunton sa pasol sa pamasin nga makakuha ko’g isda nga sarang namong masud-an sa pamahaw.

Kaadlawon pa ganing dako, nia na ko sa baybayon ug milingkod sa dakong pangpang nga nag-umbaw sa dagat. Bag-o pang nanganak ang akong asawa nga si Cleofe sa panganay namong liwat ug buot ko siyang dalitan og mainit nga sabaw sa lab-as nga tinulang isda nga ako unyang  makuha.

Dihang mihugpa na ang kahayag sa sayong kabuntagon mibarog ko ug gihipos dayon ang gitunton kong pasol. Pagkatapos, gipunit ko ang bukag ug misugod sa paglakang balik sa among pinuy-anan nga nahimutang pipila lamang ka metros gikan sa baybayon. Naglakaw kong huyhoy ang abaga samtang sa matag karon ug unya mopasiplat ko sa baybayon.

“Dawo ang dagat niining higayona kay diyotay da ang nakuha kong isda.” Nako pa sa akong kaugalingon.

“Mao ra ba kini ang kuha mo, Dong Rey?” Misugat kanako ang akong asawa ug nangutana nga nagpangyamiid samtang midawat sa gitunol kong bukag.

“Sorry, kaayo, Day Cleofe...” Tuaw ko nga ginuntan sa lawom nga pagpanghupaw. “Nahibulong bitaw sab ko nga mikalit man la’g kamingaw ang dagat. Halos tanang mamasulay nga akong nasugatan dyotay da sab kaayo ang nakuha nilang isda. Tungod tingali kay daghan na kaayo ang mananagat karon mao nga napuo gyud ang isda. Daghan man gong kompaniya ang nanira ug daghang trabahante nga sama kanako ang nawad-an sa trabaho ug midangop na lamang sa pagpanagat.”

Samtang nagluto si Cleofe sa among pamahaw miadto ko sa tindahan aron mopalit og sagol sa tinula. Ug didto sa tindahan gikahimamat ko ang duha ko ka higala nga si Ramil ug Edwin.

Nagkasulti kaming tulo kabahin sa among nakuhang isda kaganina. Ug atol sa among panagkukabildo may gihunghong si Bay Edwin kanako. Usa ka pamaagi sa pagpanagat ang iyang gisulti. Unya nagkasabot dayon kaming tulo nga mag-uban sa pagpanagat pinaagi niini karong kadlawon. Tayming sab kaayo kay takdol ang bulan!

Nianang pagkakaadlawon, mibangon ko ug giandam ang dakong bukag ug uban pang mga kagamitan sa panagat nga gihatag ni Bay Edwin kanako. Pagkatapos, gipukaw ko si Cleofe ug nananghid kaniya nga molakaw dayong patik og halok sa iyang aping ug ngabil.

“Maglagyo ta bay Rey ... adto ka sa tuong bahin ug ikaw Bay Ramil, adto sa walang bahin!” ni Bay Edwin pa dayong tunol kanamo sa dala niyang kagamitan nga naglakip usab sa pusporo. Miyango kami si Bay Ramil ug midawat sa naasoy’ng mga butang. Unya mihinayhinay dayon kami’g lakang nga nag-ubog sa taga tuhod nga tubig dagat.

Human sa pipila ka minutos, misibaw dayon sa tibuok palibot ang kusog nga buto sa dinamita. Sunod-sunod ang pagbuto niini nga kaming tulo gayud ang naghimo. Human niini, nagkapuliki ko’g panguha sa milit-ad nga mga isda. May nagkisi-kisi, may naguhayguhay ang lawas ug may putol na lamang nga isda ang akong nakuha. Hapit na mapuno ang dakong bukag nga akong dala sa nakuha kong isda dihang may napunitan kong nakapasiga sa akong mga mata. Usa ka putol nga kamot sa tawo ang akong nakuptan. Tungod niini, nakasinggit ko sa kalisang. “Bay Rey, nakita mo ba si Bay Edwin?” Tingog ni Bay Ramil ang sunod kong  nadungog. Nagdagan siya nga nagsukarap paingon sa baybayon.

“Wala Bay Ramil, pero may nakita kong putol nga kamot!” Tubag ko nga nagkabuang usab sa pagdagan paingon sa daplin. Unya nahaurong ko. May nakita kong nagpula nga tubig sa dagat ug mga piraso sa putol nga bahin sa lawas sa tawo nga nadan-agan sa kahayag sa takdol nga bulan! (Kataposan)