Masahesta ug Drayber

Matag Domingo sa hapon igahin gayud ni Rico ang iyang oras sa pagserbisyo alang sa Ginoo isip sakop sa Choir sa ilang simbahan. Napagngan sa kahayag si Rico dihang walo pa lang ka tuig ang iyang pangedaron mao nga gibansay niya ang iyang kaugalingon sa pag-awit.

Naantigohan usab ni Rico ang paggamit sa ubang kahimanan sa musika, ilabi na ang siesta. Maayo og tingog si Rico kay gani bisan ang pari mipersonal man g’yud pagsulti kaniya nga nakadayeg kini sa iyang tingog.

Usa sa hilom nga midayeg sa kanindot og tingog ug kamaayo mokanta ni Rico mao si Fe, usa ka byuda nga pirming tigsimbahan matag Domingo sa hapon.

Dili gayud sipyaton ni Fe ang pagtambong sa misa mata’g alas kwatro sa hapon atul nga si Rico usa sa mga sakop sa Choir nga moserbisyo. Ganahan gayud siya maminaw sa tingog sa buta.

Usa ka Domingo, tinukmod sa kaibog niya sa buta, giduol ni Fe si Rico human sa santos nga misa. Nagpaila si Fe ngadto sa buta ug nakig-amiga.

Diha pa masayri ni Fe nga kada Domingo ra diay nga moserbisyo si Rico isip sakop sa Choir kay nanginabuhi man usab kini isip masahesta.

“Tagpila ang charge nimo sa masahe Ric,” pangutana ni Fe. “Barato ra man Fe, kun ikaw modawat ra ko’g P250 whole body massage,” dali nga tubag ni Rico.

Miyango-yango si Fe. “Pwede ko’g magpamasahe nimo? Kanus-a ka makalugar dili ra man layo dinhi sa simbahan ang akong balay,” ni Fe pa.

Nagsukit-sukit pag-ayo si Rico hangtud nga nasuta niya nga ang balay ni Fe, dili diay layo sa balay sa usa niya ka kliyente sa masahe. “Sigi Fe, moadto lang ko sa inyong balay karong alas siete sa gabii kay mag-ilis pa usa ko,” matud ni Rico. “Maghuwat baya ko ha?” ni Fe pa nga paraygon og tingog.

Nahuna-huna ni Rico nga unahan og gamay ang balay ni Fe sa balay sa suki niya sa masahe nga si Ben. Wala pa’y alas siete sa gabii, miagi si Rico sa balay ni Ben.

“Dili man ko magpamasahe karon Ric,” ni Ben pa nga nasurpresa sa pag-abot ni Rico.

“Kuan boss, mihapit ra ko diri kay duna kuno’y imong silingan nga Fe ang ngalan magpamasahe, tinuod ba nga anaa ra sa unahan ang iyang balay?” ni Rico.

Wala dayon motubag si Ben, mora’g naghuna-huna. “Ah, kana tingali’ng seksi nga byuda nga asawa kaniadto sa nagtrabaho sa BIR ang imong gipasabot.”  -- Sumpayan