Karon lang ko nakabantay nga guwapo gyud si Bob. Kun kalitan siya’g tan-aw, look-alike si Bob ni Dingdong Dantes, ang partner kanunay ni Marian Rivera.
Ambongan gyud lagi si Bob. Pero medyo black beauty lang siya. Dili lang daling mamatikdan ang iyang kaambong. Medyo itom siya tungod kay kanunay man siyang mogawas aron mag-reading sa meter sa kuryente. Ang kaguwapo ni Bob, dili daling mahinulongan, labi na’g dili ka magpaduol niya. Dili ka ma-attract niya kun dili mo siya tutokan pag-ayo. Mora ba’g alahas nga dili mo masuta ang matuod nga bili kun dili mo kini makilatis pag-ayo. Maisip nga hidden asset ni Bob ang iyang kaguwapo.
Sa wala pa ko matental sa pagpantasya kang Bob, gipugos ko ang pagsalindot niya gikan sa akong hunahuna. Pagkataudtaud, mitingog ang message alert tone sa akong selpon. Gikan ni Raffy ang text. Usa ka inspiring message ang iyang gipadala nako.
Nianang pagkasunod semana, gisugo ko sa akong mga ginikanan sa pag-follow-up sa loan ni papa sa St. Peter Memorial Plan. Kapuyan na si papa maglakaw-lakaw kay medyo tigulang na. Maong ako na lang usay ilang gipa-follow up.
Misakay ko sa unang biyahe sa bus nga kaadlawon pang migikan sa among lungsod paingon sa siyudad. -- Sumpayan pa