Delikado ang coastal erosion

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Laing hulga na usab kining gitawag nga coastal erosion sa Pilipinas ilabi na sa nagpuyo ug kabtangan duol sa dagat. Makuyaw kaayo kini dili lamang sa mga balay ug katigayonan, kun dili hangtod na usab sa kinabuhi.

Gani, tungod niining dakong kausaban sa dagat, dunay mga dapit nga gikaon na sa dagat. Usa na niini ang kabaybayonan sa La Union. Aduna usay lugar sa Ilocos nga gihinay-hinay paglamoy sa dagat ang kabaybayonan.

Sumala sa mga eksperto, kining coastal erosion epekto sa global warming. Peligro kini kay sa higayon nga lamyon sa dagat ang kabaybayonan sa Pilipinas, moabot ang panahon nga matibhangan gayod ang area sayuta sa usa ka dapit. Kun maingon man niini, magkagamay na unya ang yuta ug mudako ang wanang sa dagat. Makunhoran gayod ang kayutaan ug mapugos pagbalhin og puyo ang mga pamilya nga kaniadto layo ra unta sa tinapya sa mga balud.

Sa usa ka dapit sa Ilocos, giingon nga usa ka kilometro na ang gilapdon sa yuta nga gikaon sa dagat. Ug ang seawall nangaguba ug nahun-ag sa sige’ng dumbol sa dagkong mga balud. Moabot unya ang panahon nga mahurot ang usa ka lugar kun dili kapugngan ang coastal erosion.

Apan daghan ang nag-ingon nga lisod pugngan sa tawo ang pagpamungot sa kinaiyahan. Kining coastal erosion matawag usab nga pagpakita sa kinaiyahan sa iyang kagamhanan. Daghan na ang mga kinabuhi nga nakalas ug mga kabtangan, agrikultura ug imprastraktura ang nangadaot tungod sa kapintas sa kinaiyahan.

Usa ka dakong problema ug hulga sa nasod sa umaabot kun dili kini kapangitaan og sulbad sa gobiyerno. Kun kinahanglanon nga butangan kini og dakong budget, nan buhaton kini sa kagamhanan. Angay lang sabton sa mga opisyal sa gobiyerno ilabi na gayod kadtong mga dapit nga naapektohan sa coastal erosion nga makamugna’g dakong kadaot ang maong problema kun pasagdan lang kini.

Hinuon, sa ingon niining hulga sa kinabuhi ug kabtangan, usa lang ang dangpanan batok sa kapintas sa kinaiyahan. Ug kini mao ang Diyos. Ang pag-ampo ug pagtuo.