Maayong motigom

Dear Tita Salie,

Have a nice day. I really need your advice and help, Tita, at this very moment of time because I don’t know what to do anymore.

By the way, I’m Mrs. Jane, 23 years of age, usa ka minyo ug kasado gyud sa simbahan. Two years na sukad ko nakasal sa akong bana but until now wala pa gyud kami anak.

Buotan kaayo kining akong bana, Tita ug wala gyud koy ikasaway kaniya. Kugihan usab siya mangita og trabaho ug maayo kaayong motigom. Wala gyud ko magmahay sa akong pagpili kaniya. Karon ania lang kami dinhi sa Cebu City nagpuyo.

Karon duna koy textmate, Tita. Aron lagi malingaw sa panahon nga duawon ko sa kalaay. Usa ka biyudo ang akong textmate ug 44 na ang iyang pangidaron. Nagkadugay ang among pagsige og text hangtod nga nanguyab siya nako. Tungod kay matud niya na-develop siya sa among pagsige og bayloay og text.

Wala nako siya pakyasa, Tita, ug akong gidawat ang iyang gugma. Kaduha na mi magkita ug akong nakita nga buotan kaayo siya. Pero nasayod ko, Tita nga dili na gyud mahimo nga kami ang magkadayon tungod kay minyo na man ko. Unsa may angay nakong buhaton? Palihog pasabta ko. Thank you very much and more power.

* * *

Dearest Jane.

Dili daotan ang maglingaw-lingaw aron mawagtang ang kalaay. Kinahanglan usab nga mo-relax panagsa. Apan kun maglingaw-lingaw ka  tan-awa usab ang imong kaugalingon kun angayan pa ba ka sa lingaw-lingaw nga imong gustong buhaton. Imo usab nga hunahunaon kun maayo ba kini ug angayan pa ba kanimo ang maong butang ug wala bay kadaot nga ihatag niini ngadto sa imong kinabuhi aron walay problema nga moabot sa imong pagpuyo. Dili gyud ka magpataka lang og buhat sa maong butang kun nasayod ka nga dili kini makaayo kanimo. Dunay daghang kalingawan ug dili kay usa lang.

Minyo na ka ug nasayod ka nga dili gyud angayan ang lingaw nga imong napilian tungod kay pakigrelasyon man kini sa laing lalaki. Dili gyud mosugot ang imong bana niini tungod kay unfair man kini ngadto kaniya. Kun ikaw kaha ang anaa sa iyang lugar mosugot ka ba nga makig-textmate siya ug makigkita og laing babaye? Of course, dili ka gyud mosugot niini.

Busa dili na gyud puyde nga kamo ang magkadayon sa imong textmate. Bisan kun wala kamo’y anak apan dili kini igong rason aron magbinuang ka ug hugaw-hugawan ang inyong kaminyoon. Putla dayon ang inyong relasyon kay makaguba kini sa inyong pagpuyo. Maoy atimana ang inyong problema. Patan-aw mo og doctor aron masayran kun unsay angay buhaton sa inyong situwasyon. -- Tita Salie