Misantop sa akong hunahuna kun unsay balidong rason nga akong ipatuo sa akong mga ginikanan nganong moadto ko sa siyudad. Wala man koy lehitimong tuyo didto sa siyudad, kay wala na may allotment nga kobrahon.
Nabalaka ko nga kun mamakak ko o maghimo’g alibi, tingali’g magduda ang akong mga ginikanan nga lain ang akong tuyo didto sa Cebu City. Dili ko gustong magbaton sila’g katahap nako.
Naglisod ko paghukom. Wala na lang nako tubaga ang text ni Raffy kay maglisod sab ko pagbalibad niya. Wala ko masayod kun unsaon ko siya pagpasabot kun nganong dili ko makahimo pagpakigkita niya didto sa siyudad.
Kaha nahibulong nganong wala ko mo-reply sa iyang text, si Raffy mi-text pag-usab nako. Mao ra gihapon ang mensahe. Gusto siyang makigkita nako sa siyudad. (Nasayod ko’s iyang tuyo).
Wala gihapon ko mo-reply sa text ni Raffy. Mas maayo pang dili ko mo-reply aron dili na siya mangutikuti. Pero nagpusotpusot na hinuon ang text ni Raffy nako. Nagmiss call pa gayod siya.
Bahala na. Nakaingon ko sa hilom. Dili gyud nako tubagon ang mga text ug tawag ni Raffy. Kun paundayonan ko siya sa gusto niyang mahitabo, posibleng masubli sa makadaghan ang kinawatkawat namong panagtagbo ug mabuking kami sa kadugayan ngadto sa katawhan.
Pagka-Domingo, misimba mi nila ni Papa Juan ug Mama Linda. Nangayo ko og pasaylo sa Diyos sa nahimo kong kasal-anana sa akong pagpadaog sa tentasyon sa unod nga maoy hinungdan nga may nahitabo na tali namo ni Raffy. -- Sumpayan pa