Ang Singer

Gula 6

Nahimong special nga bisita ni Jane si Redem. Ang ulitawo maoy gibuhosan niini sa iyang pagtagad apan nakig-uban sila sa mga amiga ni Jane samtang nangaligo.

Nasuod usab kaayo ni Redem ang mga ginikanan ni Jane. “Magpatabang lagi unta ko Ma kang Redem nga makasulod isip singer sa usa ka club sa siyudad,” giingnan ni Jane ang iyang inahan.

Gipasaligan ni Redem si Jane nga dawaton g’yud ni Mr. Ong nga tag-iya sa Wildflower Bar and Restaurant. Mao kini ang sikat nga bar kaniadto nga gibag-o na ang ngalan o wala na ang law-ay nga pasundayag.

Misugyot si Redem nga mag-uban lang sila balik sa dakbayan sa Sugbo aron mapaila-ila niya si Jane kang Mr. Ong adto sa club inigka-gabii.

Wala modumili ang mga ginikanan ni Jane nga magkuyog sila pagbalik dinhi sa dakbayan angkas sa motorsiklo nga hinuwaman ni Redem.

Hapon na sila nga migikan sa Hilasgasan, usa ka sudlonon nga barangay sa Barili, aron mobalik dinhi sa dakbayan. “Itugyan namo kanimo ang among anak dong Redem,” matud sa amahan ni Jane.

Misamot ang kasuod sa duha. Wala nay kukauwaw si Jane nga midip-ig kang Redem samtang nag-angkas sa motor. Nagpanglad-ok sa laway si Redem nga nag-imagine nga nagdikit ang masi’g nila ka lawas.

Dali ra sila nga miabot sa syudad. Mihapit usa sila sa Urgelio, sa balay sa ig-agaw ni Jane ug nag-ilis kadiyot ang dalaga aron moadto sila sa club nga gipanag-iya ni Mr. Ong.

“Dawaton ba kaha ko ni Mr. Ong no?” mabalak-on kaayo ang tingog ni Jane samtang nagpaabot sila sa tag-iya sa club. Taud-taud, nakita ni Redem nga miabot na si Mr. Ong kay ilado niya ang kotse niini nga miparking na atubangan sa pultahan sa club.

“Sir gud evening!” mihangop si Redem ug Jane kang Mr. Ong. “Uy, nahasuroy ka lagi Redem, sigi dong hatagi sila sa ilang order ug ari lang i-charge nako,” giingnan ni Mr. Ong ang waiter.

Taud-taud, mitupad si Mr. Ong kanila ni Redem ug Jane. Wala masayup si Redem, wala gayud balibari ni Mr. Ong ang hangyo ni Redem nga mokanta sa club si Jane.

“Sure basta ikaw Redem. Sigurado ko nga basta rekomendado nimo, maayo g’yud. Kanus-a ka magsugod og kanta Jane?” ni Mr. Ong pa. Nalipay kaayo si Jane nga nadawat siya isip singer sa club kay hinay-hinay na nga matuman niya ang iyang pangandoy.

“Magselebrar ta’g gamay Jane, tagsa ka botelya nga light beer,” giingnan ni Redem ang dalaga. Wala balibari ni Jane ang tanyag ni Redem.

“Kanindot unta kun matuman ang damgo ni Nanay nga sama kanimo ang babaye nga akong mapangasawa,” nagsugod pagpalabtik si Redem. -  Sumpayan