Gipasaylo ang kadanghag

“Di lang ko nimo kasab-an sir? Tungohon o balikason ba hinoon? Angayan man sab kay sad-an man ko!” sa drayber sa traysikol nga nidasmag sa Isuzu Crosswind nga gimaneho ni Jerome. Giuli ni Jerome ang lisensiya, rehistro ug prangkisa ngadto sa drayber. Nabasa niya nga ang ngalan sa drayber, Ritche Tibon. Tuig 2014 pa mo-expire iyang lisensiya. Way depekto ang rehistro ug ang prangkisa. Ang depektoso lang dinad-an ni Ritche sa traysikol. Kay kaskasero. Maong nadumbulan ang Isuzu Crosswind ni Jerome. Nabuak ang toong brake light, nalumping ang toong kilid sa Isuzu. Imbis nga maglagot si Jerome, kadismayo lang iyang gibati.

Gipaurong ni Jerome iyang sakyanan pagkadungog niya sa paka sa luyo niini. Ug nakita niya sa toong side mirror nga nisikit ang traysikol. Nabagnos ang tumoy sa walang manibela (handle) sa motorsiklo sa kilid sa Isuzu. Nalumping ang kilid ug nagaras ang pintal nga puti. Nanganaug ang duha ka pasahero sa traysikol. Nipara’g laing traysikol.

Hinay ra ang dinaganan sa sakyanan ni Jerome. Mao nay nakaparat sa hinay. Kay hiapsan og disgrasya. Mao ni kasagarang isulti sa iyang mga higalang kaskasero sa ilang sakyanan. Apan ang itubag ni Jerome “Maayo nang hinay kay madisgrasya man, gamay ra’g kadaut. Kay sa kusog nga madisgrasya, dili kay sakyanan ra’y grabe’g kadaut, kinabuhi pas nagsakay marisgo”.

“Nikalit ka man god og brake sir” sa traysikol nga nangluspad. “Ayaw na lang pangatarungan og di mao, Bay. Tungod sa akong kahinay, wa koy angay kalitan og brake. Ikaw kay kusog unya naang-angan og overtake sa laing traysikol, namodmod sa luyo sa sakyanan nga hinay sama sa akoa” ni Jerome nga daw nagmaymay. Gradwado siya’g abogasya. Ulitawo pa. Ug naghulat na lang sa resulta sa bar exams.

Namid-ok ug nagminghoy ang drayber sa traysikol. Gipangayo ni Jerome ang mga papeles sa traysikol, sa malumong tingog.

Mora’g military ang barog ni Jerome. Nag-long pants og maong. Nagsapatos og Revook rubber shoes. Nagsul-ob og puti nga T-shirt. White side wall ang tupi. Nag-shades og Ray Ban. Gihiling niya ang mga danyos sa sakyanan. Gihikap niya. Nagpanglingo siya.

Nikuot si Ritche sa iyang pitaka. Gitunol ang mga papel ngadto ni Jerome. Gidawat niya. Gibasa ang mga papel. “Di ba ni expired na imong lisensya?” ni Jerome. “Karon pa nang 2014 mo-expire” ni Ritche. Nikanga sa kakulba. “Kining danyos sa sakyanan nako, mga diyes mil gyud ni akong estimate. Pila may imong ikabayad isip areglo?” ni Jerome. “Usa ka gatos ra gyuy akong kuwarta sir” ni Ritche.

Nagpanglingo si Jerome. Nilingi siya’s iyang likod. Taas na kaayo ang trapik. Gibati’g kaikog si Jerome sa mga motorista. Giuli niya ngadtong Ritche ang mga papel.

“Wa ko’y panahon sa kasuko kay may gipangayo kong grasya sa Diyos. Karon lang biyahea nako, Biyernes man ron sa buntag. Adto ko sa Basilica. Maglakaw kong magluhod kay duna koy gipangayo sa Diyos. Adto na ko. Pag-amping lang nga sa sunod nimong disgrasya way kinabuhing makalas” ni Jerome. Unya nisakay siya’g balik sa Isuzu. Nipadagan. Gisundan og tan-aw ni Ritche. Niluta ang dakong kahibulong sa nawong ni Ritche. Daw di siya katoo nga may tawong makapasaylo sa kadanghag sa isig ka tawo.