Tradisyon
Huwebes Santo. Alas nuybe sa buntag. Daghan nang estambay sa payag-payag luyo sa munisipyo sa lungsod sa Amiraw amihanang Sugbo. Magkapundok dinhi ang mga estambay ug mga dunay trabaho. Mga sugarol ug palainom ang mag-abot dinhi. Dunay duha ka lamesa sa madyongan.
Usahay magamit gyud ang duha. Usahay sab ang usa madyongan. Ang ikaduha baraha ang sugal sama sa Tong-its, Tsikitsa o Piyatpiyat. Wa lang hinooy gubot. Kay kasagaran mga paryente ra man ang magpundok dinhi. Kusog manginom. Magtampuhay. Kun mangahubog na, may mohigda sa yuta, o may mopauli. Bisa’g duna pay lalis. Lalis ra gyud ang mahimo. Way dinapatay. Mao ra nay nakanindot ining dapita.
Apan karon, kay mahitungod man sa relihiyon ang mahisgutan tungod sa panahon, niinit ang panaglalis. Labi na nga puro way simba-simba ang nia ug lain-lain og mga tinuhoan.
“Kanang siyete palabras naa ba sa Bibliya?†ni Timoy nga niapil og sagol sa mga petsas ibabaw sa lamesa.
Wa pa sila kasugod og madyong, gisagol pa nilang upat ang mga petsas. Bisa’g kinsa lay iyang gitumong sa iyang pangutana sa tulo niya ka kaatbang nga sila si Tansiyong. Nito ug Eric. Puro mga degree holder ang nagmadyong niining usa ka lamesa. Ang pikas giduwaan lang og Tong-its nilang Elmer, Takyo, Nulfo ug Nelson.
Si Tansiyong gradwado og Computer Engineering. Si Nito gradwado og Information Technology. Si Eric usa ka CPA ug nainila nga himasa og Bibliya apan way simbasimba. Si Tinoy gradwado og Civil Engineering.
“Naa na sa Bibliya. Sa New Testament. Sa upat ka gospel o biography ni Jesus Christ. Sa Matthew, Mark, Luke ug John†ni Eric.
“Kanang mga ngalang Dimas ug Estas, naa sa Bibliya?†ni Nito.
“Ang duha ka tulisan, kawatan o bandido, walay ngalan sa Bibliya†ni Eric. Pihong si Eric ra ang makatubag sa ilang mga pangutana.
“Tinood ba ang tanang nasulat sa Bibliya?†ni Tansiyong.
“Dunay bakak sa Bibliya. Dili tanang naa diha tinood. Ehemplo ang pulong ni Pedro nga niingon wa siya kaila ni Cristo†ni Eric. Nanigang mga mata sa tulo.
“Dili diay angay tuohan ang Bibliya. Kay duna may bakak?†ni Tansiyong.
“Ang Bibliya, sinulat lang og tawo. Busa dunay sayop o mga clerical error,†ni Eric.
“Nakabasa ko sa Matthew ug Mark, duha ka kawatan ang nagbugalbugal ni Jesucristo. Kanang sa siyete palabras, usa ra ka kawatan ang nagbugalbugal. Naa sa Luke. Hain may tinood ana?†ni Tansiyong.
Nanigang mga mata ni Tinoy ug Nito. Nitan-aw ni Eric aron mohatag katin-awan.
“Bisag may nagsibag nga inpormasyon sa Bibliya, dili sabton nga isalikway na lang ang mga pagtulon-an diha†ni Eric.
“Hain man lagi tinood? Duha ang nagbugalbugal? O usa lang?†ni Tansiyong. Nangugat.
“Mas tinood ang usa lang ang nagbugalbugal†ni Eric.
“Unya unsa man lay ikasulti nimo sa sulat ni Matthew ug Mark nga duha ang nagbugalbugal?†ni Tansiyong.
“Ang pagsabot nilang Matthew ug Mark ang sayop. Mora sila’g mga reporter nga nakakita sa pag-inistoryahay sa duha ka kawatan ug ni JesusCristo. Apan wa sila kadungog kun unsay gisulti. Maong nakaingon sila nga duha ang nagbugalbugal. Samtang si Luke diha sa duol, ug dungog kaayo niya ang mga pulong sa duha ka kawatan ug sa anak sa Diyos†ni Eric. Nihayag ang mga tinan-awan sa tulo. Daw di sila katoo. Apan daw husto si Eric.
“Pareha ra god sa langaw nga pula og lubot. Kinsa man ninyo ang nakakita’g langaw nga pulog lubot?†ni Eric.
“Ako†nagdungan og isa sa ilang kamot ang tulo.
“Unsa may bulok sa lubot sa langaw nga pulag lubot? Pula ba gyud tinood?†ni Eric. Nagkatawa. Dugay’ng naghinoktok ang tulo.
“Dili pula. Lalag o yellow†ni Tansiyong. Nisabat ang duha. “Unya nganong ginganlan man nato og langaw nga pula’g lubot. Nga lalag man ang lubot. Hain may tinood? Pula o lalag?†ni Eric.
“Sakto. Tungod ra gyud diay sa tradisyon. Ang bakak mahimong tinood. Ang tinood mahimong bakak,†ni Tansiyong.
“Pulag lubot, mas dali malitok bisa’g sayop. Lalag og lubot, mas lisod litokon. Bisa’g husto. Mao ra sab na ang mahitabo sa relihiyon. Usahay, ang tradisyon nga bakak, mahimong tinood†ni Eric. Ug nanagduko sila aron pagsugod og kamada sa mga petsas. (Katapusan)
- Latest
