Pagpanglunhaw sa mga bermuda

Kaganiha ra nga namuhi ang tanang kabataang tinun-an sa elementaryang publikong eskuylahan sa baryo ug nanggawas na usab ang tanang kaubanang maestro ug maestra ni Rico, lakip na ang  ilang prinsipal nga babaye. Apan nagpabilin siya nga naglingkod sa sementadong lingkuranan nga nagliyok sa dakong punoan sa nara.

Malipayon siyang nag-aninaw sa mga bermuda nga inanay nang mibalik ang pagpanglunhaw niini. Gikan sa hataas nga kuwaresma, inanay nang migimok pagbalik ang lugom nga berdeng mga bermuda, sa halapad nga palibot sa atubangang bahin sa eskuylahan. Wala tuyoa, may panid sa kagahapon nga inanay’ng nanglunhaw usab sa handurawan ni Rico, diha sa ilang relasyon ni Brenda, kinse na ka tuig ang  nakalabay.

Gikan sa hayskol ug hangtud na sa kolehiyo, nagkahinigugmaay na sila si Rico ug Brenda. Sanglit managsilingan, misamot paglipang ang ilang duha ka gugma, hangtud nga dungan silang migradwar sa kolehiyo sa kursong pagkamaestro ug pagkamaestra.Dungan usab silang nakapasar sa Licensure Examination For  Teachers (LET) ug parehas nga naasayen dayon sa pagtudlo sa publikong elementaryang eskuylahan sa ilang baryo sa Caduawan nga nahisakop sa lungsod sa Tabogon.

Matag hapon, human sa tingpamuhi sa kabataan, magpabiling magtupad og lingkod sila si Rico ug Brenda sa sementadong lingkuranan nga nagliyok sa dakong punoan sa nara. Hisgotan nila ang tim-os nga gugma sa usa’g-usa. “Katahom gayud sa mga bermuda, Bren! Malawos man matag kuwaresma ang mga bermuda, apan mobalik kini sa pagpanglunhaw sa ting-ulan. Sama sa mga lunhaw’ng bermuda ang katim-os sa akong gugma nimo, Bren!”

“Oo, Ric! Diha  sa pagpanglunhaw sa mga bermuda, naaninaw ko usab  ang katim-os sa atong gugma sa usa’g-usa...!”

Apan wa damha, mi-abroad si Brenda. Na-hired siya nga maestra sa Amerika pinaagi sa pagproseso sa usa ka agency nga iyang naaplayan. Gipahimuslan ni Brenda ang opurtunidad. Nagkalinay-anay sila si Rico. Way puas ang ilang komunikasyon sa usa’g-usa sa dihang didto na magma-estra si Brenda sa Amerika.

Miligid ang daghang katuigan. Mora’g midat-og ang kalibutan kang Rico, dihang nabalitaan niya sa mga ginikanan ni Brenda nga nagminyo na kini og usa ka edarang negosyanteng Amerikano sa Amerika.

“Pagkalunhaw na sab sa mga bermuda...!” hilom nga nakatuaw si Rico samtang nag-inusarang naglingkod sa sementadong lingkuranan nga nagliyok sa dakong punoan sa nara ning hapona. Nahinumdoman na sab niya si Brenda.

“Tungod sa tim-os kong gugma kanimo, Brenda, nagpabilin kong ulitawo sa edad nga 40 hangtod karon...!”

“May kahulogan ang pagpanglunhaw sa mga bermuda ning hapona, Ric...!” tingog nga nabati ni Rico. Ug sa iyang paglingi sa iyang luyo, diha na si Brenda nga nagtindog sa iyang kilid ug tam-is nga nagpahiyom kaniya. Nagpabilin ang katigson sa lawas niini nga maayong pagkalalik.

“Brenda! I-ikaw ni Bren? W-w ko magdamgo? Nahiuli na diay ka...?”  “Oo, Ric! Ako kini! Human mamatay ang tigulang kong banang Amerikano nga wa gyud makahatag nako’g anak, nakahukom ko sa pagpauli ning atong dapit. Anhi na sab ko magmaestra. Nalipay kong nakabalita nga ulitawo gihapon ka. Daghan ta’g panagsultihan aron mapasabot ko ikaw...!”

Sa iyang nadungog, misayaw ang kasingkasing ni Rico sa tumang kalipay. Mitindog siya ug gigakos niya si Brenda nga migakos usab kaniya. (Kataposan)