Robinhood

Gula 6

“Unsa may tumong nimo nga manguyab ka nako Renan, aron ba lang imong binuangan? Nakadungog ra ba ko nga kamong taga siyudad igo lang mobinuang sa mga babaye ilabi na kun taga probinsya,” gisukna ni Carmela si Renan.

Pwerte nga nakapamalibad ni Renan. Gitug-anan niya si Carmela nga dugay ra siya nga nangandoy nga ang mapangasawa niya mao ang usa ka babaye nga buotan ug sigurado siya nga mounong kaniya.

“Apan bisan giunsa nako paghuna-huna, dili gayud ako angay nimo Renan kay kwartahan ka samtang kami pobre tawon kaayo,” hinay nga pamahayag ni Carmela. “Dili kana maoy gipangita nako sa babaye nga akong mapangasawa nga usa ka adunahan, ikaw maoy akong nakita nga tukma kaayo sa akong gipangita Mel,” ni Renan pa.

Daw gibula sa kalipay ang kasing-kasing ni Carmela. Kasugtonon na g’yud siya ni Renan apan dili niya malitok ang iyang gibati. Apan wala na siya mopalag dihang hinay nga gigunitan ni Renan ang iyang suwang dungan sa paglitok sa pulong “I love you.”

Mipahiyom si Renan nga nagsud-ong sa maanyag nga panagway ni Carmela. “Sigi na lang, dili man ko nimo sugton, mopauli na lang ko karon sa siyudad Mel,” matud ni Renan.

Kalit lang mipahiyom si Carmela. “Karon g’yud diay ko nimo pasugton dayon?” ni Carmela pa nga paraygon kaayo og tingog. Nagpahiyomay silang duha ug nagkasabot ang masi’g nila ka kasing-kasing.

“Gusto unta ko nga makigpanuroy nimo sa gidungog nga nindot kaayong beach resort sa Borbon,” giingnan ni Renan si Carmela. “Sigi, mangadto ta, mananghid unya ko nilang Papa ug Mama human nato og paniudto,” ni Carmela pa.

Human nila’g pangaon, gitunolan ni Renan og lima ka tagsa ka libo ka pesos si Carmela. “Ihatag kana nila ni Papa ug Mama nimo aron dili na sila maproblema sa ilang magasto.”  Wala dayon kini dawata ni Carmela. “Dia pa may subra sa imong gihatag didto sa siyudad?”

“Imo na kana, ayaw kabalaka kay dia pa ko’y kwarta,” matud ni Renan. “Salamat kaayo aning imong gitabang kanamo dong Renan ha, sigi pag-ayo-ayo mo si Carmela ug ayaw kaayo mo pagpagabii,” matud ni Carlos.

Misutoy lang ang Kia Sorento ni Renan paingon sa ilado kaayo nga beach resort sa Borbon. “Gusto ko Mel nga mangasawa dayon nimo kay basin og matintal ka pa sa lain,” nagpahiyom si Renan nga militok niini ngadto sa dalaga.

“Ayaw gani’g binuang diha Renan,” mubo nga tubag ni Carmela. Miinsistir si Renan nga wala siya magbinuang. Taud-taud, miabot sila sa beach resort. Mikuha si Renan og cottage nga ilang maestahan. - Sumpayan