Robinhood - Gula 3

Nag-ampo sila si Carmela ug ang iyang amahan nga si Carlos didto sa gamay’ng altar sulod sa simbahan. Giampo nila ang malampuson nga pag-opera sa inahan ni Carmela nga si Meling.

Melinda ang tinuod nga ngalan sa inahan ni Carmela ug kay Carlos man ang ngalan sa iyang amahan mao nga gihinganlan siya og Carmela nga gikuha gikan sa tulo ka litra sa sinugdanan sa ngalan sa iyang mga ginikanan.

Hapit na mokilum-kilom nga nahuman ang operasyon. “Oki na ang imong Mama, tua pa lang sa recovery room apan  igawas na kadto karong taud-taud ug ibalik na sa iyang ward,” matud sa usa ka doktor nga nag-opera niini.

Nakalitok og pulong pasalamat ang amahan ug anak. Kalit lang misantop sa huna-huna ni Carmela kadtong lalaki nga mitabang kanila. Gusto niya kini nga gakson sa kalipay nga gitabangan sila.

Alas utso sa gabii, gigawas na sa recovery room si Meling ug gihangop kini nila ni Carlos ug Melinda. “Diin man kamo makaremedyo og kwarta nga gigamit sa pagpa-opera nako?” nakapangutana si Meling sa iyang bana ug anak.

Wala dayon motingog sila si Carlos ug Melinda. Takulahaw lang may miabot. “Kumusta? Gitug-anan ko sa doktor nga malampuson ang pag-opera sa imong Mama, Carmela.”

Ang tawo diay nga mitabang ni Carmela maoy miabot. Wala gayud kapugngi ni Carmela ang paggakus sa tawo tungod sa kalipay. “Kinsa ba kini siya day? Kaila diay kamo?” pangutana ni Meling sa iyang anak.

“Wala pa ko makaila niya Ma, apan siya ang mitabang nga maoperahan ka ug mapalit ang mga gikinahanglang tambal. Unya gihatagan pa g’yud ko niya og kwarta nga atong magasto dinhi,” wala kapugngi ni Carmela ang paghilak.

“Siya diay maoy mitabang kanato day? Salamat sir ha?” matud ni Carlos nga mihikap sa bukton sa maong tawo.

“Wala’y sapayan. Natan-aw lang nako nga angayan kamo nga tabangan kay nakit-an nako kini si Carmela nga naghilak didto sa lobby kaganina kay nag-ungaw sa kakuyaw ang kinabuhi sa iyang pinangga nga Mama,” sa tawo pa.

Gitutokan pag-ayo ni Carmela ang nawong sa maong tawo nga mitabang kaniya. “Wala pa nimo ko tug-ani sa imong ngalan,” giingnan ni Carmela ang buotan niya nga higala.

Mipahiyom ang tawo. “Importante pa ba diay ang akong ngalan? Buyno, ako si Renan,” matud sa tawo. Nahinangop kaayo sila si Carmela nga nailhan na nila ang buotang tawo nga mitabang kanila.

“Salamat kaayo dong ha?” matud ni Meling sa tingog nga maguwang lang sa hagawhaw.

“Buyno, tana mangaon usa ta. Nasayud ko nga wala pa kamo makakaon,” giingnan ni Renan ang amahan ug anak. - Sumpayan