Bugti sa barato

 â€œSunod higayon, sir, ayaw na gyud og patubil og krudo nga baratohon” ni Randy, suki nga mekaniko ni Henry. Nagtunol si Randy sa yawe sa sakyanan ngadtong Henry ning sayong kahaponon. Mikabat og duha ka adlaw ang pagtrabaho niya sa sakyanan ni Henry. Nagparking ang Isuzu Crosswind nga abuhon sa hawan nga luna gawas sa talyer ni Randy sa habig sa sidlakan. Giandam na niya ang sakyanan nga human nag trabaho aron sayon makuha sa tag-iya.

“Asa na man lang diay ko patubil og krudo?” ni Henry. Nidawat sa yawe nga gitunol sa mekaniko, ginamit ang walang kamot.

Nangawot sa ulo ginamit ang toong kamot. Nakapanglab-ok og laway nga nitutok ni Randy.

Sige man god og kaaberiya iyang sakyanan. Palyawo. Magpataypatay. Way minor. Sulod sa niaging tulo ka bulan, kaupat na siya nagpailis og fuel fiter. Nabara sa hugaw ang mga linya ug piyesa nga maagian sa krudo. Sa ikaupat ka higayon nga nagpailis si Henry og fuel filter, nisugyot na gyud si Randy sa kompleto nga solusyon sa problema.

“Limpiyohan na lang nako ang tangke sa krudo. Nasayod kong puwerte nang hugawa imong tangke. Labi na nga gipahibawo ko nimo nga mga baratohon nga krudo imong gipatubil kanunay. Kay kun di limpiyohan ang tangke, magbalik-balik ra gihapon ang problema. Bisa’g kapila ta mag-ilis og fuel filter,” ni Randy usa ka buntag duha ka adlaw na ang nakalabay. Dihang gihatud ni Henry ang sakyanan sa talyer.

Usa ka CPA si Henry. Tulo ka tuig na nga si Randy ang tigmintin sa iyang sakyanan. Mismo sa pag-change oil ug washing and greasing, si Randy iyang suki.

“Tan-awa ra god o. Diyes litros pay sulod sa imong tangke” ni Randy nga nibiking sa taro nga hamabaw sa sulod nga lobog nga likido.

Gibutang atubangan sa gibarogan ni Henry. Wa una siya nitubag sa pangutana ni Henry. Naglasalasa ang krudo nga mora’g tubig sa kanal.

“Mao nay sulod sa akong tangke?” ni Henry. Nanigang mga mata.

“Mao. Pan-os man gani og baho” ni Randy.

“Busa, asa na man lang ko patubil?” ni Henry.

“Pili ka lang sa big 3 oil company” ni Randy.

“Unsa man na sila?” ni Henry.

“Petron, Shell ug Caltex. Kun magdaginot ka’s baratohon nga krudo, sakyanan nimo ang madaut. Mas dako ka pag gasto sa pagpaayo” ni Randy.

Naleksiyon si Henry. Tigpatubil siya’g full tank senemana sa kinabaratuhang gasoline station duol sa iyang opisina. Nakahukom na siyang di na patental sa barato. Kinyentos pesos ray gipangayo ni Randy sa iyang serbisyo. Gihatagan ni Henry og tibook usa ka libo. Keep the change. Kay bilib siya’s mekaniko nga tinarong moserbisyo. Nitagam siya’s barato nga may bugti nga mas mahal. (Kataposan)