Libro mahal kaayo, maestro may porsiyento?

Libro sa Math ug Management sa first year college ang presyo tag-P1,000? Grabeha!

Nahimo nang praktis sa tunghaan nga ang maestro maoy magbuot unsang libroha ang ipagamit sa iyang mga estudyante. Siya sab ang magbuot asa kini mapalit? Ang makapahibulong kay dili ni available sa ubang tindahan. May exclusive bookstore kini nga mao ray namaligya sa maong libro. Mao nga makapatuyang gyud pagpataas sa presyo ang mga mapahimuslanon.

Akong anak nakapalit sa nahisgutang libro. Gitagaa’g discount nga P3.00 (tres pesos), diin mao na lang intawoy sukli sa iyang tibuok P1,000. Dinha ni niya mapalit sa bookstore duol sa Redemptorist Church.

Mahal ang maong libro kay matud pa sa maestro, aduna kini individual internet code number, diin maoy gamiton inig hatag niya’g eksam. Ang pasulit sa mga estudyante adto ipaagi sa on-line internet ug kun wala ka niining klaseha sa libro...aw di ka makaapil!

Apan naunsa ba, nga pag-report nila’g usab sa ilang klase, giingnan bitaw na sila sa titser nga puwede ra wala’y code ang librong gamiton. Kini tungod kay ang ilang umaabot nga mga eksam dili na lang diay lagi sa on-line.

Nadismaya ang mga tinun-an. Samot na, ang mga ginikanan! Lalim bay ang bili sa libro nga wala’y code, P750 ra man...unya ang dunay code, P1,000? Kadako’g deperensiya? Ang nakamaot pa gyud kay dihang pailisan na nila ang mas mahal nga libro nilang napalit ngadto sa mas barato, wala nay stock ang bookstore. Nahurot na kuno ug magpaabot pa’g pipila ka semana o bulan nga maka-reimprinta.

Gumikan niini, ang nakapalit sa mahalong libro (nga pareho ra gyu’g contents sa baratohon) miutong na lang ning business strategy nga ilang namatikdan. Alkanse na man sila kay ang klase nagsugod na baya! Busa, wala na nila giuli ang mahalong libro. Napugos na lang intawon ang mga pobre sa paggamit niini bisa’g kaaway sa ilang buot.

Pangutana: Ning gibuhat sa maestro ug bookstore ngadto sa mga tinun-an, wala kahay bulok sa sabotahe? Wala kahay under the table nga porsiyento ang maestro nga madawat gikan niining bookstore nga mapatuyangon kaayong mipataas sa presyo sa mga libro?

Director ug mga Heads sa Department of Education (DepEd), tingali panahon na, nga ato ning susihon, da! Nabuktot na intawon ang mga parents sa nagtipun-og nga galastohan sa eskuylahan, uy! Unya, pun-an pa ini nila?