Pagligas diha na ko...!

Suod sila nga managkompadre. Si  Dadong drayber sa giabangan nga pasaheroang jeepney. Iyang konduktor si Enzo nga kompadre niya. Bag-ong minyo si Dadong samtang may anak nga lalaki si Enzo nga kinugos ni Dadong. Pulos sila nagkinahangla’g kuwarta sa ilang pagpuyo ug sa dayon nang garahe sa ilang sakyanan, si Dadong nag-ingon kang Enzo: “Ugma sayo sa kaadlawon, kuhaon ta sa eskina ang mga tindera sa isda...!”

“Unsang orasa, ‘Pre....?” Sukna ni Enzo.

“Ala-1:00 sa kadlawon ug manuktok ka lang mga alas dose karong gabii sa akong payag...!” Patin-aw ni Dadong nga mipasulod sa garahe sa ilang sakyanan diha sa panimalay sa ilang amo. Ang payag nga giabangan ni Dadong may mubo nga silong, may kusina ug kan-anan atbang sa pultahan nga may hagdan duha ka ang-ang paingon sa lawak-katulgan. Husto ra gyud sa bag-ong minyo ang giabangan nga payag....!

Sayo nga nangatulog si Dadong ug iyang asawa nga si Elna. Gibutang sa ilang ulohan ang plaslayit ug gamay’ng orasan aron maoy mopukaw kanila. Mikiring ang orasan pag-abot sa alas dose. Mibangon si Dadong ug nanghuyatid samtang si Elna padayon sa iyang katulog. Gikuha ni Dadong ang plaslayit ug gitukas ang bintana. Gi-iwagan niya ang palibot. Wa siya’y nakita bisan anino lang. Ug mibalik paghigda si Dadong tupad sa iyang asawa nga andam ug tagana bisan unsang orasa.

“Wa pa man si ‘Pare Enzo...!” Mihunghong si Dadong sa iyang asawa nga nagpaabot lang sa higayon. Ug parayegong mitanday si Dadong kang Elna.

Mao pa’y pag-abot ni Enzo sa payag ni Dadong. Manuktok na unta si Enzo apan may nabati siya nga mi-igot ang katulganan sa magtiayon dungan ang parayegong hagawhaw ni Elna.

“Yuna pa ‘Dong kay naligas. Hinay lang, wa pa bitaw si ‘Pare Enzo...!” Hagawhaw ni Elna. Mao nga mibalik na lang sa agi si Enzo ug mipungko sa balisbisan sa payag sa iyang kumpadre Dadong. Ug didto nabati sab niya ang hangos sa kagabhion...!

“Oy, ‘Pre, ganiha ka ra...? Nganong wa ka man manuktok...?” Matud pa ni Dadong ngadto sa iyang kumpadre Enzo nga nagtuk-ong sa may balisbisan.

“Oo, ‘Pre, pagligas dinhi na ‘ko. Naikog ‘kong manuktok...!” Tubag ni Enzo nga mitindog sa iyang gipungkoan. Gisirhan pagbalik ni Dadong ang bintana. Gikuha niya ang T-shirt ug nanamilit kang Elna. Nanaug si Dadong sa iyang payag nga medyo naulaw sa sulti sa iyang kumpadre Enzo. (Katapusan)