Tinagoan nga gugma

Naluoy kong nagtan-aw kang Felisa. Nag-inusara intawong nanambo sa iyang karaang balay. Nagtindog siya sa balkon. Lawom kaayo ang gihunahuna. Tingali abot sa langit ang iyang pagbasol sa iyang pagkapilian kaniadto.

Silingan ra mi. Managsama kami’g edad. Nasuheto ko sa iyang kinabuhi. Gani, gawas nga silingan kami, managhigala pa gayod. Siya ang labing matahom sa among dapit sa San Isidro. Sa nag-eskuyla pa siya sa hayskol, kanunay siyang kuhaong muse sa tulunghaan. Mao sab sa pagtungha niya sa kolehiyo.

Apan bisan pa sa iyang kaanyag, wala gayod siya makabaton og hinigugma. Unsaon man sab lagi, grabe ka pilian.

“Manguyab lang ko, Carmela, kun makita ko ang lalaki nga akong gipangita.”

Nahinumdom ko sa iyang gisulti usa ka higayon niana nga nagkasakay kami sa pagpauli sa among dapit gikan sa siyudad. Nagtungha kami sa kolehiyo niadtong tungora.

“Unsa bang matanga sa lalaki ang imong gusto, Felisa?” Nakapangutana ko niya niadto kay naglibog gyod ko nga luyo sa iyang  katahom wala pa gayod siya makigrelasyon og lalaki.

“Da, kana bang lalaki nga gipitik gayod sa akong kasingkasing.”

“Ah.” Miyangoyango ko dayong katawa. “Muabot  ra na nimo, uy.”

Naminyo na lang ko kang Greg apan nagpabiling dalaga si Felisa. Aw, unsaon man diay niya pagminyo nga hangtod niadtong higayona wala pa man gayod siya’y hinigugma.

Gikaila ko si Greg sa siyudad. Dali ra kaming nagkasinabot kay gimahal man namo ang usa’g-usa. Sukad sa akong pagminyo kang Greg, kanunay nang magduawan si Felisa nako. Misamot ang among panagsuod. Malipayon kaayo siyang makigsulti kanamo ni Greg.

Nagkaanak na lang kami si Greg apan dalaga gihapon si Felisa. Ug wala gihapon siya’y hinigugma. Gipakyas niya ang mga lalaki nga naninguha sa iyang gugma.

Ug karon, managsama na kaming retirado si Felisa sa pagka magtutudlo sa tulunghaan publiko. Aduna na koy mga apo. Usa nako ka anak babaye nga minyo mitipon og puyo nako kay tigulang na man ko.

Mikanaog ko sa balay ug giadto ko si Felisa. Nalipay siya pagduaw ko niya. Sukad nga namatay si Greg, wala na magduawan si Felisa nako.

“Maayo kay nia ka, Carmela, aron duna koy ikasulti-sulti.”

“Gilaayan sab ko sa balay, Felisa.”

“Mas laay ang akong kinabuhi, Carmela, kay nag-inusara lang.”

“Ikaw man god, sobra ka pilia’g lalaki maong wa maminyo.”

“Di ko pilian og lalaki, Carmela. Nahigugma na ko, uy. Pero tinagoan nga gugma lang kay dili ko man gyod siya maangkon. Minyo siya sa suod kong higala ug silingan pa gayod.”

“H-Ha?” Puwerte kong kuganga. Gikulbaan ko. “Kinsa man siya, Felisa?”

“Si Greg nga imong bana, Carmela.”

Wala ko makasabot sa akong gibati niadtong higayona. Mora ko’g wala magtunob sa yuta sa ako nang pagpauli. Apan nakapahiyom ko. Duha diay kaming nagmahal kang Greg. (Kataposan)