Hayahay ang Polis

Gula 6

Pagkahapon na, wala g’yud mosipyat kay mi-text kang Larry si Marie Shiela ug nagpasalamat na usab kaniya sa iyang pagtabang nga dili kini mabilanggo.

“Thanks g’yud kaayo sir Lar, unsaon kaha tika pagbawos,” ni Marie Shiela pa. Gitug-anan ni Marie Shiela si Larry nga gibuwagan niya ang boyfriend niya kay mao kini ang nag-agni kaniya nga mokuyog-kuyog niadtong duha ka babaye nga nadakpan.

“Sakit unta nga buwagan nako ang akong boyfriend sir Lar apan bati ang iyang pagkatawo kay adis-adis wala ta’y kaugmaon. Bahala na og nakuha na ko niya dili na g’yud ko,” matud ni Marie Shiela. Gitubayan ni Larry og text-text si Shiela ilabi na ang gibutyag niini nga nakuha na diay siya sa iyang boyfriend. Hangtud nga naglami pa gayud ang ilang pagbayloay og text. “Unsa g’yud kaha ang akong ibawos nimo sir Lar no?” ni Shiela pa nga mora’g wala gayud mahimutang.

Nakahuna-huna si Larry nga iyang kumedyahan si Shiela. “Wala ka na man kaha’y boyfriend, pwede ba og makigdeyt ko nimo Shiel?” matud ni Larry sa iyang text message. Bisan og minyo na si Larry apan kapin pa lang sa 20 ang iyang pangedaron mao nga dili pa kaayo managkalagyo ang ilang edad ni Shiela.

Taud-taud nga wala na’y nadawat nga text si Larry. Nabalaka si Larry nga masuko kaniya si Shiela tungod sa pagtanyag nga magdeyt sila. Apan taud-taud, nakadawat ra og reply si Larry.

“Sige, mosugot ko apan promise nga kini ra’ng kausa ha? Bayad na nako ni sa pagtabang nimo nako,” ni Shiela pa. Nakapahiyom si Larry nga nagbasa sa reply ni Shiela, ingon siya sa dili makatoo nga misugot si Shiela nga makigdeyt kaniya.

Mitingog na usab ang iyang selpon. Si Shiela gihapon ang nag-text. “Kanus-a ka man makigdeyt nako sir Lar?” Gihuna-huna ni Larry nga dili niya dugayon kay basin og mausab ang huna-huna ni Shiela ug dili na hinoon makigdeyt kaniya.

“Unyang gabii? Pwede?” giteksan ni Larry si Shiela. “Sa hapon lang kay pangitaon ko nila ni Papa kun madugay og uli sa gabii,” ni Shiela pa. Tuod, nananghid si Larry sa iyang opisyal ug nagpasumangil nga adunay importante nga lakaw.

Nagkadeyt g’yud tinuod sila si Larry ug Shiela. Didto sila nagkita sa downtown ug gidala usa ni Larry si Shiela og snack sa usa ka food outlet.

“Dili ka kaha magbasol nga mouban kanako karon Shiel?” matud ni Larry nga mitutok kang Shiela. Karon pa g’yud niya makita ang kaanyag ni Shiela. Mora’g gusto na niya kini nga tupsan sa mga hawok. - Sumpayan