Dear Tita Salie,
Hello a wonderful day and how are you. I just hope that you are in good health always, Tita Salie. Just call me Ms. Virgo, 24 years ug usa sa mga nagsunod sa imong column. Malingaw gyod ko nga magsige og basa’g Banat News ug labina sa mga problema nga gikan sa atong mga kaigsuonan kay ako man kini kakuhaan og daghang mga pagtulon-an.
Ang akong problema, Tita, mahitungod kini sa akong gugma. Dalaga pa ko apan duna koy gikatipon karon nga usa ka lalaki. Ang naka-apan lang, Tita, kay minyo ang maong lalaki pero buwag na siya sa iyang asawa 6 years na ang nakalabay.
Nagminahalay ming duha, Tita, bisan pa man kun wala siya magustohi sa akong pamilya ug kaliwatan tungod lagi sa iyang kahimtang. Tinuod nga mahal kaayo nako kining lalakiha ug maong nisugot ko nga magtipon niya. Pero sa among relasyon, Tita, usa ra gyod ka butang ang akong gipangayo mao ra gyoy akong gusto nga iya kong pakaslan aron mamahimo ko niyang legal nga asawa. Apan ang naka-apan kay dili man gyod niya kini mahatag kanako.
Unsa may akong buhaton, Tita Salie? Ako lang ba siyang bulagan? Palihog tabangi ko ug pasabta ko sa akong problema. Daghang salamat.
* * *
Dear Ms. Virgo
Dili gyod husto ug dili maayo nga makigtipon ka kaniya tungod kay minyo man siya ug dunay tawo nga mas may katungod kaniya. Kun diskompyado ang iyang asawa sa imong pagtipon puyde kaayo mo i-demanda sa iyang asawa ug uwaw kaayo kun duna tay giatubang nga kaso.
Busa husto ug maayo ang imong hukom nga maniguro gyod sa kinabuhi. Pangayoa kaniya ang kaminyoon. Kun dili niya kini mahatag kanimo at least duna kay hinungdan nga dili ipadayon ang inyong gugma.
Maoy hinumdomi nga tam-is ang magpuyo nga gawasnon ug walay gikahadlokan. Lingaw ang kinabuhi kun kita walay gikabalak-an.
Bisan kun 6 years na silang bulag sa asawa apan sila lang gihapon ang magtiayon. Busa hulata nga ma-annul ang ilang kaminyoon aron siya mamahimo na nga gawasnon. Kay dili ka gyod mahimutang nga makigtipon sa tawong dunay tag-iya.
Kun kita mahigugma kinahanglan gyod nga atong hunahunaon kun dili ba kita magproblema niini. Ayaw paundayoni ug pasagdi ang imong kasingkasing nga maoy mogiya kanimo tungod kay daghan kaayong butang nga dili niya makit-an ug masabtan. -- Tita Salie