Hayahay ang Polis

Gula 5

Daghang mga polis ang nag-ibid-ibid sa gwapa nga babaye nga usa sa mga dinakpan ug usa na kanila si Larry.

Si Larry maoy gitahasan sa ilang opisyal nga mopahigayon sa pagkuha og fingerprint sa mga dinakpan mao nga nakahigayon siya nga nakapaduol sa gwapa nga babaye.

Gituyo ni Larry nga ipauwahi ang mga babaye ug kataposan g’yud kanila ang gwapa. Gipakigsultihan usa ni Larry ang babaye sa wala pa niya kuhai og fingerprint.

“Nakagamit ka na ba sa wala pa moabut ang akong mga kauban ganina?” matud ni Larry ngadto sa babaye. “Wala sir uy, miuban ra man ko sa duha nako ka amiga, sila maoy mga drug users na,” matud sa gwapa’ng babaye.

“Kun tinuod nga wala ka pa gayud makagamit og drugas, tabangan tika nga makalingkawas aron dili ka makasohan,” giingnan ni Larry ang babaye. Daw naglumpayat sa kalipay ang babaye.

Gitan-aw ni Larry ang card para sa maong dinakpan ug iyang nasuta nga Marie Shiela diay ang iyang ngalan. Hinay nga gigunitan ni Larry ang mga tudlo sa gwapa nga dinakpan ug gipatuyok-tuyok ngadto sa thumb pad.

“Kalomoy sa imong mga tudlo, nagtungha ka pa ba Mar?” gipangutana niya ang babaye. Mitangdo si Marie Shiela. “Nahadlok baya ko kay ambot unsaon ko sa akong mga ginikanan kun masayran nga nadakpan ko basin motoo sila nga tiggamitan ko og shabu,” sa dalaga pa.

Human og fingerprint sa mga dinakpan, giabagan ni Larry si Marie Sheila nga ma-drugtest. Iyang giduol ang ilang opisyal ug gipasabot sa sitwasyon. Iyang gipahinumdoman ang opisyal nga dunay balaud nga ang mga dinakpan mahimo nga i-subject og drugtest ug kun mapositibo i-rehabilitate.

“Luoy ‘sab kaayo kun iapil nato kining usa pagpasaka og kaso sir kana kun tinuod nga wala gayud siya makagamit og illegal nga drugas,” gipasabot ni Larry ang iyang opisyal.

Gitugotan si Larry sa iyang opisyal nga ang tulo ka babaye isumiter og drug test adto sa PNP Crime Laboratory Service. “Sigurado g’yud ko sir Lar nga ma-negative ko kay wala g’yud ko makagamit og shabu,” matud ni Marie Shiela.

Tuod, wala mosipyat si Marie Shiela kay negative g’yud ang resulta sa drugtest. Gihukman sa opisyal ni Larry nga dili kini iapil sa pagpasaka og kaso.

“Salamat g’yud kaayo sir Lar ha kay kun wala pa ko nimo tabangi, mapriso g’yud ko. Mangayo ko sa imong contact numbers bi,” matud ni Marie Shiela. Nagbayloay sila’g contact numbers. – (Sumpayan)