Dili magustohan

Dear Tita Salie,

Hello! Daghan kaayo magbasahan og pasabta diri sa among lugar, Tita Salie, labina sa among eskuylahan sa Cantabaco National High School, manago gyod mi, Tita, aron makabasa lang og Banat News.

Tagoa lang ko sa pangalan nga Wildan, 3rd year high school ug kanunay lang mabigo sa pag-ibig.

Gusto lang ko mangayo nimo og advice o tips alang sa akong kaugalingon aron dili nako kanunay masakitan.

Duna man god ko’y nagustohan nga usa ka babaye diri sa among dapit. Na-inlove gyod ko niya, Tita, apan dihang ako siyang gipangulitawhan iya man ko nga gibalibaran. Of course sakit kaayo alang kanako, Tita, tungod kay nakagusto kaayo ko kaniya. Ug dili kay karon lang kini nahitabo kanako. Kasagaran gyod sa mga babaye nga akong magustohan wala may gusto ngari kanako. Naglibog gyod ko, Tita, kun nganong ingon niini ang akong kapalaran.

Manghinaot lang unta ko nga imo kong matabangan. Unsa may angay nakong buhaton? Palihog pasabta ko. Thank you very much and more power.

* * *

Hi, Wildan, tan-awa una pag-ayo ang imong kaugalingon kay tingali kun dili ikaw ang lalaki nga gipangandoy sa mga babaye nga imong gipangulitawhan mao nga igo ka lang nilang giyam-iran.

Kun kamong mga lalaki mamili mo og babaye nga maoy gusto ninyo ulitawhan, pareho ra usab kanamong mga babaye. Duna usab kami mga ideal man nga maoy gusto namong mamahimong uyab o karelasyon.

Tingali kun imong napilian nga panguyaban ang mga babaye nga dili ikaw ang type o wala kanimo ang katangian sa ilang ideal man. Siyempre, dili ka gyod   nila sugton kay wala man silay feelings diha kanimo.

Abi god nimo, ang mga babaye dili kaayo mahilig og gwapo. Of course, makatan-aw mi og lalaki nga gwapo pero mo-prefer gyod mi sa relasyon nga buotan, caring ug loving and understanding ang among uyab. And of course, amo usab nga tan-awon kun responsable ba ang maong lalaki kun kaya ba niining mabuhi ang pamilya.

Paningkamot lang una sa imong pagtuon ug pagbinuotan kanunay sa imong kinabuhi. Nakaseguro ko nga kun duna kanay nahuman nga kurso o labina kun duna kanay trabaho dali ra unya nimo mapasugot ang babaye nga imong maibgan. -- Tita Salie