Caroline

Gula 5

Nagdali sila nga namiya sa balay ni Carol human nga makuha ang alahas. Apan samtang nagsakay sila aron mangita unta og kaprendahan sa mga alahas, mitingog ang call alert sa selpon ni Artemio.

“Mao ba sir? Sori sir, gitugotan lang nako ang subject nga makapangita og ikabayad niya sa pyansa. Mosirit na kami didto sa korte sir,” matud ni Artemio nga mora’g gigil-asan.

Iyang gitug-anan si Carol nga dili na sila mulahos sa pagpangita’g kaprendahan sa mga alahas kay nangita na ang asawa sa ilang opisyal sa kapolisan ngano nga wala pa mahatud sa korte ang dinakpan.

“Mao ba? Unsaon na man lang ni nako karon?” mabalak-on kaayo ang tingog ni Carol. Samtang nagdagan ang kotse, gikuha ni Artemio ang kopya sa warrant of arrest ug gipasiklapan ang kantidad sa gibutang nga pyansa.

“Trayenta mil g’yud. Buyno, ingon niini ang atong buhaton, duna ko’y gamay’ng tinigum sa bangko, magkobra lang ko sa BPI-Branch duol sa Kapitolyo aron magamit nimo nga pyansa,” giingnan ni Artemio si Carol.

“Sige, salamat kaayo sa imong kabuotan ha? Sagdi lang, mabayran ra nako na kay dia may mga alahas nga kun mabaligya ni nato daku pa kaayo ang kantidad,” ni Carol pa.

Tuod, naka-withdraw g’yud og kwarta si Artemio gikan sa iyang savings account sa ATM. Nagdali sila nga mipaingon sa RTC Branch sa Palace of Justice nga maoy nag-isyu sa warrant ni Carol.

“Mao na ang asawa sa opisyal nga nakuhaan nako sa alahas kanang naglingkud sa atubangan sa lamesa sa clerk of court,” matud ni Carol.

“Dong, gikuyawan g’yud ko kun diin na kamo mopaingon. Abi nako og nakaikyas na kining walay uwaw,” matud sa asawa sa opisyal sa kapolisan nga klaro kaayo nga mapahitas-on.

“Sori kaayo Ma’am, may gihuwat pa man gud ang akusado nga iyang ig-agaw nga maoy mihatag og kwarta para sa iyang pyansa. Naghuwat ra kami didto sa canteen sa Campo,” ni Artemio pa nga wala motug-an sa tinuod.

Nagpanglingo-lingo ang asawa sa opisyal. “Sa ato pa dili diay ni siya mapriso?”

Dunay ahente sa insurance company nga kalit lang miabot ug maoy mihikay sa mga dukomento aron mapirmahan ni Carol. Gikuhaan si Carol og hulagway nga nag-atubang ug nagtakilid.

Dali ra nga nahikay ang pyansa. “Sige magkita ta sa sunod higayon sa husay sa kaso,” pintok ang sinultihan sa asawa sa opisyal ngadto ni Carol.

Gi-release ra si Carol human makabayad sa kantidad nga pyansa. “Mangaon usa kita Artemio. Daku kaayo ko’g utang kabubut-on nimo kay kun wala ka pa, sigurado nga mabilanggo g’yud ko sa city jail.”- Sumpayan