Lunop ug Baha

Gula 6

Gusto nga sutaon ni Siegfred kun gimingaw ba kaniya si Pamela sa mga adlaw nga wala sila magkita. Kini maoy rason nga wala gayud siya mokontak sa dalaga sa milabay nga mga adlaw.

“Really? miss ko nimo?” matud ni Siegfred sa iyang reply ngadto ni Pamela nga nangumusta kaniya ug mipakapin og pulong nga miss na niya ang ulitawo.

Gikuot ni Siegfred ang iyang selpon nga diha sa bulsa sa iyang T-shirt human niya madungog ang message alert. Tuod, wala siya mosipyat kay gi-reply diay dayon ni Pamela ang iyang message. “Kita ta taud-taud, sweldo namo gahapon ug ako na sa’y bangka nimo Fred.”

Nagkasabot sila nga magkita sa usa ka kan-anan sa Ayala Terraces untop alas sayes. May igo pa nga panahon. Nagpalit si Siegfred og pahumot sa department store atbang sa iyang gitrabahoan. Buot maniguro si Fred nga humot siya sa ilang subli nga panagkita ni Pamela.

Kulbahinam alang kang Fred kay wala motubag si Pamela dihang iya kining gipangutana kun tinuod ba nga gimingaw na kini kaniya sa mga adlaw nga wala sila magkita.

Sa restaurant nga ilang gikasabotan nga adto sila magkita, wala pa kaayo’y mga customer ug nangita si Fred og maayo nga lugar. Didto sa daplin nga makita ang lawn sa terraces.

“Naa ka na diha Fred? On d way na ko,” mubo nga message ni Pamela. Nakasabot si Fred nga nag-drive si Pamela mao nga mubo ra ang iyang text.      Gi-reply ni Fred ang message ni Pamela.Gusto ni Fred nga si Pamela maoy mo-order sa ilang pagkaon. Bisan og mitanyag si Pamela nga maoy mobangka ug mobayad sa ilang gasto, apan nakahukom si Fred nga mao ra ang mobayad.

Tuod, wala madugay miabot ra si Pamela. “Wow! Misamot ka kagwapa karon Pam,” wala gayud makapugong si Siegfred sa pagpadayag sa iyang pagdayeg sa kaanyag sa dalaga.

“Bantug ra nga sa mga adlaw nga wala ko ikaw makita dili matukib sa pulong ang gibati ko nga kamingaw kanimo Pam,” ingon sa salabtunon kaayo ang mga pulong ni Siegfred.

“Pareho diay ta. Miss ‘sab tika Fred. Gusto baya ni Mama nga pabisitahon ka sa balay kay magpasalamat g’yud siya nimo sa daku kaayo nimo nga natabang kanamo,” ni Pamela. Igo lang miyango ug mipahiyom si Fred. “Tinuod bitaw Fred, miss ka g’yud namo ni Mama.”

“Sige, human sa atong deyt, ubanan tika sa inyo kana kun dili nimo ikasuko,” matud ni Fred. “Mopauli diay ta dayon? Miss na baya ko nimo Fred,” ni Pamela pa nga paraygon kaayo og tinan-awan. - Sumpayan