Lunop ug Baha - Gula 3

“Dali sakay na Fred,” giingnan ni Pamela si Siegfred dihang nakapahimutang na siya sa atubangan sa manobela sa iyang kotse.

Nakapahiyom si Siegfred kay nakapasiklap siya nga wala siya’y sapatos kay gihukas man kini niya dihang giubog niya sa tubig-baha si Pamela aron tabangan sa iyang pagka-abereya.

“Tan-awa ra gud, paubanon ko nimo nga walay sapatos,” wala makapugong si Siegfred sa pagpahiyom. Nakakatawa na lang ‘sab si Pamela nga nakabantay nga wala diay sapatos si Fred.

Gipahuwat usa niya si Pamela samtang gikuha ni Fred ang iyang sapatos nga gibilin niya sa tindahan ni Virgie. Mibalik si Fred sa awto nga nagtiniil gihapon kay lawom pa ang tubig nga mibanaw sa karsada.

“Nagsakripisyo ka g’yud tawon nako Fred uy. Unsa kaha’y akong ibawos nimo. Sigi na diri na lang sa awto isul-ob ang imong sapatos,” ni Pamela pa.

Karon pa makahimungawong si Siegfred nga hitsuraan diay si Pamela. Angayan kaayo kini sa iyang gisul-ob. “Dagku ‘sab mo’g sweldo isip med-rep Pam no?” matud ni Siegfred. “Igo-igo lang uy, dagku ‘sab kaayo mi’g gasto, labi na maintenance sa awto,” ni Pamela.

Didto sila mangaon sa kan-anan sa SM. Si Pamela g’yud tuod ang mibangka sa gasto. “Unya, motrabaho ka na karon?” gisukna ni Pamela si Siegfred.

Naghinuktok kadiyot si Siegfred apan taud-taud, giingnan niya si Pamela nga dili na lang siya motrabaho. “Igahin na lang nato ang tibuok hapon sa pagpanuroy kay mo-absent ka man ‘sab kaha sa imong trabaho,” giingnan ni Siegfred si Pamela.

Hilig diay og bowling si Pamela mao nga giubanan kini ni Siegfred. Dayon nanulod sila sa lainlaing mga tindahan, nag-window shopping. Kadto maoy nakapasuod dayon kanilang duha. Gabii na nga nagbuwag-buwag sila si Pamela ug Siegfred. Nagbayloay sila og contact numbers.

Walay adlaw nga dili sila magbayloay og text messages. Nasayran ni Siegfred nga may boyfriend na si Pamela apan naproblema kini kay walay trabaho, barkadista.

Dihay higayon nga misuroy si Siegfred sa SM ug nagkakita sila si Pamela. Si Siegfred na usab ang nangimbitar kang Pamela. Sa kan-anan nga ilang gisudlan gisaysay kaniya ni Pamela ang iyang problema.

Nanginahanglan kini’g kwarta kay masakiton ang iyang inahan. Nalooy gani g’yud si Siegfred kay mihilak si Pamela nga nagsugid sa iyang problema kay daku na sila og bayranan sa ospital.

“Taga dinhi ba kamo sa dakbayan sa Sugbo? Botante ba ang imong Mama sa syudad Pam?” gisukna niya si Pamela. Igo lang miyango si Pamela. “Kun mao kana, duolon nato si Mayor Rama, magpatabang ta,” dugang ni Siegfred. - Sumpayan