Ang kadula ni Matet

Samtang nagkalingaw og laba ang iyang Mama Nora ug nagkalos og tubig sa atabay ang iyang papa Dario, malipayon si Matet ning udtoha nga nagtabyogtabyog sa duyan ilawom sa dakong punoan sa tugas, nga gituyo pagtaod ug paghigot sa iyang papa Dario sa dakong sanga sa kahoy ug gihimo niyang duladulaan matag udto ug hapon, pinaagi sa pagsakay ug pagtabyogtabyog niini.

Nahimong kalingawan ni Matet ang pagsakay ug pagtabyogtabyog sa duyan matag adlaw’ng Sabado ug Domingo nga way klase ang primaryang eskuylahang publiko nga iyang gi-eskuylahan sa baryo. Sa edad nga nuybe, anaa pa si Matet sa Grade three. Samtang padayon siya nga nagtabyogtabyog sa duyan nga gisakyan, daw may gipangita si Matet sa palibot sa dakong punoan sa tugas.

“Hain man kaha ang akong kadula? Wa man motunga si Joshua...?”

Unya, may sitsit nga nabati si Matet.

“Ania ra ko, Matet...!” tingog nga nabati ni Matet.

Napahunong siya sa pagtabyogtabyog sa duyan ug maoy nasugat sa iyang panan-aw ang puting pamayhon sa iyang kadula nga nagpahiyom kaniya, nga nagtindog sa kilid sa dakong punoan sa tugas. Nagkatawa si Joshua nga hugot mitutok kang Matet.

“Gilipat ko sila’s papa ug mama aron makahigayon ko sa pagpakigkita nimo, Tet! Mao nga nadugay ko...!”

“Aw, abi man gud nako og dili ka mopakita nako karon magdula ta, Josh...!”

“Ambot, supak man gyud sila’s papa ug mama nga magkasuod ta, Tet!”

“Asa man gyud diay ang balay ninyo, Josh...?”

“Kanang naa sa unahan gud, Tet...!”

“Pangpang ug labong kakahuyan man sa unahan, Josh...?”

“Mao lagi nang among balay, Tet! Dili man gud ta parehas nga matang nga linalang ning kalibutan. Dili ta parehas og kalibutang gipuy-an, Tet; Engkanto man mi...!”

“Hala, engkanto diay ka, Josh? Mao diay nga dili gyud ka makita nilang papa ug mama kanang magdula ta sa duyan. Nahibulong sila’s papa ug mama, kay makigsulti kuno ko’s akong kaugalingon...!”

“Kay miga man tika, ikaw lang gyud ang makakita nako, Tet! Bahala nag mortal ka ug imortal ko, Tet! Basta migo ug miga gyud tang duha! Dula ta kanunay..!”

“Sugot ko, Josh! Basta migo ug miga gyud tang duha, ha...?”

“Oo, Tet! Kadula mo ako kanunay...!”

Ug sakay sa duyan, malipayong nagtabyogtabyog sa duyan si Matet uban sa iyang kadulang engkanto niadtong udtoha. (Kataposan)