Maria Magdalena

Gula 101

Misayo diay si Daniel og adto sa merkado ug nangompra. Mipalit siya’g nagkadaiyang klase sa lab-as nga mga isda. Nagpalit pud siya’g alimango.

“Tabangan ta unya ni’g luto, ha,” niya pa.

“Oo,” matud ko. “Pero mamahaw una ta. Nakaluto na man ko.”

“Sige.”

Namahaw mi. Human sa pangaon, gitabangan namo’g hikay ang mga sud-anon nga pinalit ni Daniel tagana sa umaabot niyang bisita nga iyang bestfriend.

Hapit na ang tingpaniudto sa dihang may sakyanan nga mihunong sa tungod sa among balay. Si Daniel ang nagsusi kun kinsa ang nahiabot.

“Loves,” ni Daniel pa nga misangpit nako. “Nia na si Walter.”

Wala madugay nakita ko si Daniel nga misulod sa balay nga may kuyog nga mestisohong lalaki. Insekon og mata ang maong lalaki. Gipaila kini ni Daniel kanako. Si Walter!

Sanglit unang higayon nga nagkahimamat kami si Walter, gitunol niya kanako ang binukhad niyang tuong kamot alang sa pakiglamano. Nag-ukon-ukon ko pagdawat kay ingon sa gibati ko ang kabakikaw sa sitwasyon. Wala ko makasabot kun nganong naingon ako niadto. Apan aron dili ingnong suplada, nakiglamano ko kang Walter.

“Kumosta ka, Maria,” ni Walter nga mapahiyumon.

“M-maayo man,” mubo kong tubag.

“Glad to meet you.”

“Nice meeting you too.” -- Sumpayan pa